अर्थ प्रणाली 
काठमाडौं । सर्वसाधारणका लागि साधारण शेयर (आईपीओ) निष्काशनको तयारीमा रहेको एन.सि. एग्रोटेक इण्डस्ट्रीज लिमिटेडको सातौँ वार्षिक साधारण सभा सम्पन्न भएको छ । काठमाडौंको बसुन्धारास्थित सेफ हस्पिटालिटी एण्ड पार्टी भेन्युमा साधारण सभा सम्पन्न भएको हो ।
सभाले आर्थिक वर्ष २०८१/८२ को सञ्चालक समितिको प्रतिवेदन, लेखा परीक्षकको प्रतिवेदनसहित वासलात, नाफा–नोक्सान तथा नगद प्रवाह विवरण पारित गरेको छ । कम्पनीको जारी पूँजी ७५ करोड रुपैयाँ, चुक्ता पूँजी ५६.२५ करोड रुपैयाँ, बैंक ऋण ३.५६ करोड रुपैयाँ, संचित मुनाफा १.४६ करोड रुपैयाँ रहेको प्रतिवेदनमा उल्लेख छ । कम्पनीकाे प्रति शेयर आम्दानी रु. ४.२० र नेटवर्थ प्रति शेयर रु. १०२.६० रहेको छ । कम्पनीले सर्वसाधारणका लागि १८ लाख ७५ हजार कित्ता अर्थात् १८ करोड ७५ लाख रुपैयाँको आईपीओ जारी गर्ने योजना बनाएको छ । कम्पनीले आईपीओ निष्काशनको लागि धितोपत्र बोर्डमा आवेदन दिइसकेको र पाइपलाइनमा रहेकाे छ ।
उद्योग आजभन्दा ७ वर्ष अगाडि स्थापना भएको हो । उद्योगले चिनियाँ प्रविधिको मेसिन उपकरणसहित २ जना प्राविधिकलाई ३ वर्षसम्म वर्क प्रमिट भिसामा ल्याएर उद्योग स्थापना गरेको हो ।
उद्योगले किसानको कृषि उत्पादनपछि खेर गएका धानको भुस, गहुँको भुस, उखुकाे बगास, मकैको पिठो, पिना, चोकर, गहुँ, काठको धुलो, कुखुराको सुली र गाई भैँसीको मल आदिलाई पुनः प्रयोग गरी राजा च्याउ, डल्ले च्याउ, कन्या च्याउ, र अन्य औषधीय गुण भएका च्याउहरु उत्पादन गर्दै आएको छ । विशेष गरी किङ वेस्टर मसरुम नामको अन्तर्राष्ट्रिय ब्राण्डको राजा च्याउ उद्योगको मुख्य आकर्षक उत्पादन हो ।
उद्योगले देशका विभिन्न भेगमा पाइने बाँसहरु संकलन गरी टूथपिक, ससेज स्टिक, मुडाको स्टिक र विभिन्न अर्डर अनुसारको बाँसको सिन्काहरु उत्पादन गरी सो उत्पादन गर्दा खेर जाने भुस र च्याउ उत्पादनपछि खेर जाने वस्तुहरुलाई पुनः प्रयोग गरि कोइला, हुक्का कोइला र अर्गानिक मल उत्पादन गरि किसानहरुलाई नै बिक्री वितरण गर्दै आएको छ । यसले उत्पादनमार्फत राष्ट्रलाई आत्मनिर्भरतर्फ अगाडि बढाइरहेको सभामा जानकारी दिइयाे । उद्योगबाट कुनै पनि चिज खेर नजाने उद्योगका अध्यक्ष यज्ञमूर्ति न्यौपानेले शेयरधनीहरुलाई जानकारी गराए । उद्योगले प्रत्यक्षरुपमा १७० जना भन्दा बढी मानिसहरुलाई रोजगारी दिँदै आएको संचालक दीपक प्रसाद न्यौपानेले सभालाई जानकारी गराए । जसमध्ये ५० प्रतिशत जति महिला कामदारहरु रहेको उनले जानकारी दिए ।
उद्योगले विशेषगरी च्याउ, बाँसबाट बन्ने चिजहरु, कोइला, हुक्का कोईला, अर्गानिक मल, कम्पोस्ट मल, च्याउको बीउ, औषधीय गुण भएका च्याउहरु र त्यसको चिया, पाउडर र क्यापसुल उत्पादन गरेर देशलाई आत्मनिर्भर बनाई विदेशमा निर्यात गर्ने लक्ष्य समेत लिएको छ । सभामा विश्वभरि पाईने विभिन्न प्रकारका खाद्य च्याउ तथा औषधीय गुण भएका च्याउको अनुसन्धानको लागि च्याउ विज्ञ टिकाराम अर्यालको नेतृत्वमा अनुसन्धान तथा विकास विभाग खडा गरी काम गरिरहेको जानकारी दिइयाे । कम्पनीले कृषि उत्पादनमा नयाँ–नयाँ प्रविधि, बीउ, अध्ययन अनुसन्धान, तालिमसहित नेपाललाई कृषि क्षेत्रमा आत्मनिर्भर बनाउनुका साथै अन्य मुलुकमा निर्यात गर्ने लक्ष्य राखेको दाेहाेर्याएकाे छ ।
