अर्थ प्रणाली 
काठमाडौं । एक वर्षमा नेप्से सूचकाङ्क २१२ अंकले घटेको छ । नेपाल राष्ट्र बैंकले सार्वजनिक गरेको चालु आर्थिक वर्षको साउन मसान्तसम्मको तथ्याँकअनुसार २०८१ साउन मसान्तमा ३०००.८१ रहेको नेप्से सूचकाङ्क २०८२ साउन मसान्तमा २७८८.३७ कायम रहेको छ ।
२०८२ साउन मसान्तमा धितोपत्र बजार पँुजीकरण रु.४६ खर्ब ५६ अर्ब २७ करोड कायम भएको छ । २०८१ साउन मसान्तमा बजार पुँजीकरण रु.४७ खर्ब ६५ अर्ब ९१ करोड रहेको थियो । २०८१ को साउन मसान्तमा बजार पुँजीकरण कुल गार्हस्थ्य उत्पादनको ८३.४८ प्रतिशत रहेकोमा २०८२ साउनमा ७६.२४ प्रतिशत रहेको छ ।
राष्ट्र बैंकका अनुसार २०८२ साउन मसान्तमा नेपाल स्टक एक्सचेन्ज लिमिटेडमा सूचीकृत कम्पनीहरूको सङ्ख्या २७४ पुगेको छ । सूचीकृत कम्पनीहरूमध्ये १३२ बैंक तथा वित्तीय संस्था र बीमा कम्पनी रहेका छन् भने ९२ जलविद्युत कम्पनी, २३ उत्पादन तथा प्रशोधन उद्योग, ७ होटल, ७ लगानी कम्पनी, ४ व्यापारिक संस्था र ९ अन्य समूहका रहेका छन् । २०८१ साउनमा सूचीकृत कम्पनीहरूको संख्या २६८ रहेको थियो ।
सूचीकृत कम्पनीहरूमध्ये बैंक तथा वित्तीय संस्था र बीमा कम्पनीको धितोपत्र बजार पुँंजीकरणको हिस्सा ५२.६ प्रतिशत रहेको छ । त्यसैगरी जलविद्युत कम्पनीको हिस्सा १५.३ प्रतिशत, लगानी कम्पनीको हिस्सा ७.६ प्रतिशत, उत्पादन तथा प्रशोधन उद्योगको हिस्सा ५.६ प्रतिशत, व्यापारिक संस्थाको हिस्सा ५.० प्रतिशत, होटेलको हिस्सा २.७ प्रतिशत तथा अन्य समूहका कम्पनीहरुको हिस्सा ११.१ प्रतिशत रहेको छ ।
केन्द्रीय बैंकका अनुसार नेपाल स्टक एक्सचेन्ज लिमिटेडमा २०८२ साउन मसान्तमा सूचीकृत ८ अर्ब ८८ करोड शेयरको चुक्ता मूल्य रु.८७५ अर्ब ३३ करोड रहेको छ । आर्थिक वर्ष २०८२/८३ मा रु.७ अर्ब ५० करोड बराबरको साधारण शेयर, रु.७१ करोड ८५ लाख बराबरको बोनस शेयर र रु. २ करोड २५ लाख बराबरको हकप्रद शेयर गरी कुल रु.८ अर्ब २४ करोड बराबरको थप धितोपत्र सूचीकृत
भएका छन् ।
समीक्षा अवधिमा नेपाल धितोपत्र बोर्डले रु.६ अर्ब ८ करोड बराबरको म्युचुअल फण्ड, रु.३ अर्ब ७८ करोड बराबरको हकप्रद शेयर र रु.४७ करोड १५ लाख बराबरको साधारण शेयर गरी कुल रु.१० अर्ब ३३ करोड बराबरको धितोपत्र सार्वजनिक निष्काशनका लागि अनुमति दिइएको छ ।
