वरुण वेभरेजसहित व्यवसायजन्य सुरक्षा तथा स्वास्थ्य क्षेत्रमा उत्कृष्ट व्यवस्थापन अभ्यास गर्ने सात प्रतिष्ठान सम्मानित

काठमाडौं । सरकारले व्यवसायजन्य सुरक्षा तथा स्वास्थ्य क्षेत्रमा उत्कृष्ट व्यवस्थापन तथा अभ्यास गर्ने सातै प्रदेशका सात वटा प्रतिष्ठान सम्मानित गरेको छ । श्रम रोजगार तथा सामाजिक सुरक्षा मन्त्रालयले प्रत्येक प्रदेशबाट एक÷एक गरी सात प्रतिष्ठानलाई सम्मानित गरेको हो । मन्त्री शरदसिंह भण्डारीको उपस्थितिमा कोशी प्रदेशका बुट्टाबारी टि प्रालि, मधेसको डाबर नेपाल प्रालि, बागमतीको वरुण विभरेज (नेपाल) प्रालि, गण्डकीको गोर्खा ब्रुअरी प्रालि, लुम्बिनीको विजय डिष्टिलरी प्रालि, सुदूरपश्चिमको महाकाली सुगर इ प्रालि र कर्णालीको शुभ होटेल प्रालिलाई सम्मान गरिएको हो । कार्यक्रममा व्यवसायजन्य सुरक्षा तथा स्वास्थ्यको प्रवद्र्धन, अनुसन्धान, नीतिगत परामर्श र सचेतनामूलक गतिविधिमा योगदान पु¥याउने प्रा. डा. सुनिलकुमार जोशीलाई कदर पत्रसहित सम्मान गरिएको थियो । सम्मानित हुने प्रतिष्ठानहरूलाई बधाई दिँदै मन्त्री भण्डारीले व्यवसायजन्य सुरक्षा र स्वास्थ्यको समुचित प्रबन्धबाट श्रमिकको उत्पादकत्व अभिवृद्धि हुने बताएका छन् । उनले यसको अभ्यासबाट मुलुकको समग्र आर्थिक एवं सामाजिक विकासमा सकारात्मक प्रभाव पार्ने भन्दै सबै प्रतिष्ठानलाई कार्यस्थल स्वास्थ्य, सुरक्षित, व्यवस्थित एवं मर्यादित बनाउन आह्वान समेत गरे । मन्त्रालयका सचिव डा. कृष्णहरि पुष्करले विगतको अभ्यास, अनुभव र कमीकमजोरीका आधारमा व्यवसायजन्य सुरक्षा र स्वास्थ्यको स्थितिमा सुधार गर्दै लग्नुपर्नेमा जोड दिए । यसको अभ्यासले स्वयं प्रतिष्ठानको सफलता निर्धारण गर्ने उनको भनाइ थियो ।

श्रम तथा व्यवसायजन्य सुरक्षा विभागका महानिर्देशक चक्रपाणि पाण्डेले सम्मानित हुने प्रतिष्ठानहरूलाई २० वटा मापदण्डका आधारमा चयन गरिएको जानकारी सो अवसरमा दिए । उनले यस सम्मानले आगामी दिनमा व्यवसायजन्य सुरक्षा तथा स्वास्थ्यका क्षेत्रमा योगदान पु¥याउन अन्य प्रतिष्ठानलाई उत्प्रेरित गर्ने विश्वास व्यक्त गरे ।