अर्थ प्रणाली 
काठमाडौं । केडिया ग्रुपको आयोजनामा पहिलोपटक हुन लागेको पुरुषको एनभीएल (नेपाल भलिबल लिग) मा सहभागी हुने टिमको नाम बिहीबार सार्वजनिक गरिएको छ । हाललाई ६ टोलीको नाम सार्वजनिक गरिएको हो भने बाँकी २ टिमका लागि आवेदन खुला रहेको आयोजकले जनाएको छ ।
सहभागिता निश्चित भएका टिममा सगरमाथा स्म्यासर्स, मधेश वारियर्स, काठमाडौं रेड्स, अन्नपूर्ण स्पाइकर किङ्स, कर्णाली शिवराज र खप्तड फाल्कन्स रहेका छन् ।
सगरमाथा सन्नी राज भण्डारी र बन्नी राज भण्डारी, मधेश कम्पास इन्टरटेन्मेन्ट नेटवर्क प्रालि, काठमाडौं क्वेस्ट फार्मास्युटिकल्स/क्यु स्पोर्ट्स म्यानेजमेन्ट प्रालि, अन्नपूर्ण सुमिरा स्पोर्ट्स भेन्चर प्रालि, कर्णाली लक्षसरा फिल्म्स प्रालि र खप्तडा खप्तड फाल्कन्सको स्वामित्वमा रहेको छ ।
कार्यक्रमकी प्रमुख अतिथि कराते स्टार खेलाडी एरिका गुरुङले एनभीएल भलिबलको मात्र नभइ सबै खेललाई अगाडि बढाउने सुरुआत विन्दु हुने विश्वास व्यक्त गर्दै लिग यादगार र सफल रहोस् भनी शुभकामना दिइन् ।
केडिया ग्रुप अध्यक्ष विमल केडियाले राष्ट्रिय खेल भलिबललाई अझ नयाँ उचाइमा लाने उद्देश्यले पुरुषको नेपाल भलिबल लिग आयोजना गर्न लागेको बताउदै सबै मिलेर लिगलाई सफल बनाउनु पर्नेमा जोड दिएका छन्।
नेपाल भलिबल लिगका प्रबन्ध निर्देशक अश्विन केडियाले एनभीएल केवल लिग मात्र नभइ खेलाडीलाई ग्रासरुटदेखि व्यावसायिक कोर्ट र अन्तर्राष्ट्रिय मञ्चसम्म पुर्याउन एनभीएल पुल बन्ने विश्वास व्यक्त गरे ।
नेपाल भलिबल संघका अध्यक्ष जितेन्द्रबहादुर चन्दले पहिलोपटक पुरुषको फ्रेन्चाइज लिग सुरु हुनु सुखद पक्ष भएको बताउदै लिगले सरोकारवालालाई प्रत्यक्ष/अप्रत्यक्ष रुपमा फाइदा पुग्ने धारणा व्यक्त गरे ।
नेपाल भलिबल संघको सहयोगमा हुने एनभीएल त्रिपुरेश्वरस्थित राष्ट्रिय खेलकुद परिषद्को कभर्डहलमा हुनेछ । लिगको मिति चाँडै सार्वजनिक गर्ने आयोजकले जनाएको छ ।
