अर्थ प्रणाली 
काठमाडौं । पूर्व प्रधानमन्त्री बनिसकेका नेकपा एकीकृत समाजवादीका अध्यक्ष माधबकुमार नेपालले आफू पुनः प्रधानमन्त्री बन्नसक्ने भन्दै मुख मिठ्याउँदै प्रधानमन्त्री पुष्पकमल दाहाल प्रचण्ड र नेकपा एमालेका अध्यक्ष केपी शर्मा ओलीलाई सार्वजनिक कार्यक्रमबाटे घुर्क्याइरहेका थिए । जनता र देशलाई जेसुकै होस् आफू प्रधानमन्त्री बन्ने दाउमा थिए नेपाल ।
त्यतिमात्रै होइन उपप्रधानमन्त्री लिएर सत्तामा पुगेका जसपा अध्यक्ष उपेन्द्र यादव पनि आलोपालो प्रधानमन्त्री बन्ने दौडमा थिए । यस विषयमा नेपाली कांग्रेसका सभापति शेरबहादुर देउवा, नेपाल र यादबबीच भित्रभित्रै खिचडी पाकिरहेको आशंका गरिएको थियो । तर गीतमा ‘उडायो सपना सबै हुरीले’ भनेझैं यादवलाई भएको छ यतिबेला ।
अरुलाई आफू प्रधानमन्त्री बन्ने डरले कतिपयलाई भित्रभित्रै पोल्न थालेको भनेर अरुलाई भनिरहेका माधव नेपालको मन यतिबेला आफैंभित्र पोल्न थालेको छ । कारण जसपा फुट हो । निर्वाचन आयोगले अशोक राई नेतृत्वको नयाँ पार्टीलाई दलको मान्यता दिएपछि माधव नेपाल र उपेन्द्र यादवलाई भित्रभित्रै पोल्न थालेको हो । यसले उपेन्द्र यादवको मन्त्री पद नै संकटमा परेको आँकलन हुन थालेको छ । जसपाबाट फुटेर अशोक राईको नेतृत्वमा गठित जनता समाजवादी पार्टीलाई आयोगले मान्यता दिएको हो । आइतबार राईले ७ सांसदसहित नयाँ दल दर्ताका लागि निवेदन दिएका थिए। उनी नेतृत्वको पार्टीमा प्रदीप यादव, नवलकिशोर साह सुडी, वीरेन्द्र महतो, रेनु यादव, रन्जु कुमारी, हसिना खान र सुशीला श्रेष्ठलगायत ९ जना सांसद रहेका छन्।
राजनीतिका खेलाडी ओली र प्रचण्डले कुन बेलामा कस्तो गोटी चाल्नुपर्दछ भनेर जानेका र सोही अनुरुप जसपालाई फुटको संघारमा पुर्याएको चर्चा यतिबेला छ । कुल १२ सिट रहेको जसपा फुट्नु त एउटा घटना हो । त्यो भन्दा पनि उपेन्द्र यादव पक्षले सरकारको समर्थन फिर्ता लिए पनि अहिलेकै सत्ता गठबन्धनको बहुमत रहिरहने छ । त्यसपछि कांग्रेस नेतृत्वमा बन्ने सम्भावित नयाँ गठबन्धनको बहुमत पनि पुग्न सक्ने अवस्था देखिन्न । त्यसले जसपा फुट्दा अर्को गठबन्धन र सरकार बन्ने सम्भावना तत्काललाई टरेको छ । यता प्रधानमन्त्रीको कुर्सी ताकेर दाउ हेरिरहेका माधव नेपाल र उपेन्द् यादव यता न उताका भएका छन् ।
नेपालमा सरकार बनाउने र भत्काउने अनि अस्थिरतामा रमाउने खेल नौलो होइन । त्यही खेल खेल्न बानी परेका नेताहरु कहिल्यै नसुध्रिने रहेछन् भन्ने अवस्था पछिल्ला घटनाक्रमले बताइरहेको छ । यो विभिन्न खेलले केन्द्रदेखि प्रदेश हुँदै स्थानीय तहसम्म थप नयाँ अस्थिरता सिर्जना गर्ने देखिन्छ । महिना बित्न पाएको छैन आफूले पद पाउँछु कि भनेर गठबन्धन परिवर्तन गर्ने र केन्द्रदेखि प्रदेशसम्मका सरकार परिवर्तन भएर नागरिक वाक्क भएको बेला उपेन्द्र यादवले फेरि सरकार परिवर्तन गर्न लागेकाले नयाँ दल दर्ता गर्नु आफूहरुको बाध्यता रहेको अशोक राई पक्षका नेताहरुको भनाइ छ ।
सत्तामा पुग्न लोभ मात्रै गरिरहने नेताको प्रवृति नसुध्रिएका कारण नेपाल र यादव दुवै समस्यामा पर्ने राजनीतिक विश्लेषकहरुको भनाइ रहेको छ । आफैंले थापेको जालमा आफैं परेजस्तो भनेजस्तैगरी माधव नेपाल यतिबेला आफ्नै पार्टी र नेताबाट आलोचित मात्रै छैनन् झसङ्ग भएका छन् ।
जसपा फुट्दा कसैले खुसी मनाउलान् त कसैले दुःख मनाउलान् । तर यहाँ साना दलले अस्थिरता र बार्गेनिङ गर्ने र शक्ति एवं सत्ता परिवर्तन भइरहने खेल भने जारी नै रहने देखिन्छ । अझै सरकार कतिबेला परिवर्तन हुने हो कसैलाई पत्तो छैन । यसले नागरिकमा वितृष्णा ल्याउनेछ । त्यसैगरी दलीय व्यवस्थामाथि प्रश्नचिन्ह उठिरहेका बेला यो व्यवस्थालाई नै कमजोर बनाउनेछ ।
अब दल र तीनका नेताहरुले पदको प्रण होइन देश विकासको प्रण गरेर अगाडि बढ्नुपर्ने नागरिकहरुको बभाइ छ ।
