लक्ष्मण न्यौपाने, उदीयमान पर्यटन व्यवसायी एवं अध्यक्ष, थुम्की रिसोर्ट 
काठमाडौं । नेपालमै केही गर्नुपर्दछ । आफ्नै माटोलाई उर्वर बनाउनुपर्दछ । आफ्नै ठाउँमा केही गरेर युवालाई रोजगारी दिनुपर्दछ । उत्पादनमुलक बन्नुपर्दछ । यस्तै सोच र सपना धेरैको हुन्छ । त्यसैमध्येको एक नाम हो लक्ष्मण न्यौपाने । उदीयमान पर्यटन व्यवसायी जो सबैका अगाडि मिजासिलो स्वभाव प्रस्तुत गर्दछन् । न्यौपानेलाई आफ्नै गाउँ ठाउँमा केही गरौं भनेर धेरै पहिलेदेखि चलिरहेको हुटहुटी चलिरहेको थियो । त्यो साइत पनि जुर्दै गयो । परिस्थिति त्यतैतर्फ निर्माण हुँदै गएपछि न्यौपानेले आफ्ना सपना सुरु गर्छु भनेर लागे । त्यसपछि तीन दाजुभाई मिलेर सपना साकार पार्नेतर्फ अगाडि बढे र थुम्की रिसोर्ट अगाडि बढाउने निर्णय लिए । त्यसको नेतृत्व न्यौपानेले गरेका छन् । चार वर्ष अगाडि सुरु गरेको रिसोर्ट करिब एक वर्ष अगाडि सम्पूर्ण तयारी पुरा गरेर सञ्चालनमा रहेको छ । बिहान सनराइज हेरेर बेलुका सनसेटको बिदाई गर्न रिसोर्टबाट सकिन्छ । रिसोर्ट पारिवारिक जमघट, सेमिनार, अर्गानिक स्वादको विश्रामको लागि उत्कृष्ट गन्तव्य बनेको छ । यसै सन्दर्भमा प्रस्तुत छ अर्थ प्रणाली डट कमले उदीयमान पर्यटन व्यवसायी एवं थुम्की रिसोर्टका अध्यक्ष लक्ष्मण न्यौपानेसँगको कुराकानीको सम्पादित अंशः
थुम्की वास्तवमा कस्तो रिसोर्ट हो ? त्यहाँ कस्ता मानिसहरू जान सक्छन् र विशेषताहरु के छ ?
काठमाडौँबाट ३५ किलोमिटरको दूरीमा र बनेपाबाट पनि १३ किलोमिटर दक्षिणमा पर्दछ काभ्रेको बल्थली । त्यहीँ अवस्थित छ थुम्की रिसोर्ट । थुम्की अर्थात् डाँडको टुप्पोबाट बिहान र दिउँसोको समयमा हिमालय श्रृंखलाको दृष्यावलोकन, बिहान र साँझको समयमा सूर्याेदय र सूर्यातको दृष्यसहित उत्कृष्ट प्राकृतिक मनोरम दृष्यावलोकन गर्न सकिन्छ । यहाँ ठाउँ हेर्नका लागि मात्रै भएपनि मानिसहरू जाने गर्दछन् । त्यो नजिकै विश्वकै सबैभन्दा ठूलो त्रिशुल भएको लड्केश्वर मन्दिर पनि छ । त्यहाँ पनि धेरै मानिसहरू जाने गर्दछन् । गतवर्ष नेपालका राष्ट्रपति, राजा, काठमाडौँका मेयर लगायत राज्यका विभिन्न तहका उच्च पदस्थहरु पनि पुगेका थिए । हाइकिङका लागि महाभारत रेन्जकै अग्लो ठाउँ काभ्रेको सबैभन्दा अग्लो ठाउँ नारायणथान छ । त्यहाँ धेरै आन्तरिक र बाह्य पर्यटकहरू पुग्दछन् । त्यही बाटो भएर प्रकृतिसँग रमाउने मानिसहरू त्यहाँ जाने गर्दछन् । खानामा टिपिकल चिजहरु रहेका छन् । आफ्नै फार्महरूमा पालिएका लोकल (स्थानीय) खानाहरू, अर्गानिक खानाहरू रिसोर्टमा उपलब्ध छ । अहिले हामीले दिएको सेवाबाट ९५% भन्दा बढी मानिसहरू सन्तुष्ट नै भएर फर्किरहनु भएको छ । त्यहाँ मानिसहरूले पूर्णरूपमा मनोरञ्जन गर्ने, रिफ्रेसमेन्ट हुने गर्दछन् । मेडिटेसन योगा, ध्यानका लागि धार्मिक पर्यटनका लागि पनि यो ठाउँ प्रसिद्ध छ । नजिकै नमोबुद्ध रहेको छ । हाइकिङको लागि जान सकिने ठाउँ हो त्यो ।
रिसोर्टले कति मानिस राख्न सक्ने क्षमता छ ? सभा, सम्मेलन सेमिनार गर्न सकिन्छ ?
रिसोर्टमा अहिले दुईवटा हलहरू छन् । एउटामा ५० र अर्कोमा ७० जना बसेर कार्यक्रम गर्न सकिन्छ । रिसोर्टले एक रातका लागि ६० जनासम्म राख्न सक्दछ । त्यो क्षमता छ । यसरी भन्दा ७० जनासम्म एउटै हलमा राखेर कार्यक्रम गर्न सकिन्छ । आवश्यक पर्दा टेन्ट सर्भिस गरेर समेत पाहुनाहरूलाई राख्न सकिन्छ । त्यहाँ पुग्नेहरुका लागि बिहान खेलकुद गर्ने चौर छ । फुटबल खेल्न सकिन्छ । विशेषगरी स्कुलका भाइबहिनीहरू त्यहाँ जाने गर्दछन् । उहाँहरूको कार्यक्रम गर्न सकिन्छ । अफिसियल कार्यक्रमहरू गर्न सकिनेछ । सभा, सम्मेलन गर्न सकिनेछ । त्यसैगरी विदेशी पर्यटकहरू पनि गइरहेका छन् । वरिपरि हिमाल देखिन्छ र त्यो ठाउँ हिमालको काख जस्तै देखिन्छ । डाँडाको टुप्पो काहीँ कतैबाट छेकिँदैन । सनराइज र सनसेटको मनोरम दृश्य देख्न सकिनेछ । रिसोर्टमा बिहान सनराइज हेरेर बेलुका सनसेटको बिदाई समेत गर्न सकिन्छ ।
नाम थुम्की पनि त्यसै भएर राखिएको हो ?
थुम्की भनेको आफैंमा एउटा डाँडाको टुप्पो हो । त्यो ठाउँको पुरानो नाम नै थुम्की हो । त्यो गाउँको पुरानो नाम नै थुम्की हो । आफ्नै गाउँको नाममा प्रचार गरौँ न किन यो विदेशी विभिन्न नाम लिइरहनु भनेर हामीले थुम्की नाम राखेर सुरु गरिएको हो । हामीलाई यही नाम नै बढी प्यारो लाग्दछ ।
अर्गानिक खाना पाइने भनिएको छ, के–कस्ता परिकार पाईन्छ ?
रिसोर्टमा नेपाली अर्गानिक खानाको स्वादमार्फत मज्जा लिन पाइनेछ । त्यहाँ इटालियन अन्य कन्टिनेन्टल, चाइनिज, इटालियन सबै देशका खानाहरू पाइन्छन् । विशेषगरी हाम्रो जोड चाहिँ त्यहीँको नेपाली खानामा रहेको छ । अर्को प्याकेट मसलाहरू हामी प्रयोग गर्दैनौँ । पिरोमा अकबरे खुर्सानी मात्रै प्रयोग गरिन्छ । तेलमा तोरीको तेल मात्रै प्रयोग गरिन्छ । अजिना मोटो लगायत कुनै पनि प्याकेट मसला हामी कहाँ जाँदैन । त्यहाँ लोकल कुखुराहरू पाइन्छ । त्यहाँ कालिज फर्म छ । बदेल लगायत खान पाइन्छ । बिहानको सुरुवात नै कोदो, फापरको परिकारबाट हुन्छ । त्योसँगै फलफुल पनि राखिन्छ । ब्रेकफास्ट त्यसरी सुरु हुन्छ । हामीले पर्यटकको आवश्यकता अनुसार पाउरोटी पनि दिनुपर्ने हुनसक्छ । तर हाम्रो रिसोर्टमा एक दुई प्रतिशतले मात्र पाउरोटी खान्छन् । हामीले दिएको कोदो फापरका परिकार र फलफुलमा नै पाहुनाहरू सन्तुष्ट हुने गर्दछन् । अरु परिकारहरू चाहनुहुन्न । पारिवारिकरुपमा त्यहाँ जान सकिनेछ । पारिवारिक रूपमा जान कोही चाहन्छन् भने हामीले नै काठमाडौँबाट त्यहाँ जाने व्यवस्था गरिदिनेछौँ । लैजाने र ल्याउने दुवै व्यवस्था हुने गर्दछ । त्यस्तै अफिसियल ग्रुपहरू जान सक्दछन् । मिटिङहरूको लागि मानिसहरु जान सक्दछन् । विभिन्न ग्रुपहरू जान सक्दछन् । विभिन्न कार्यक्रमको लागि रिसोर्टलाई गन्तव्य बनाएर जान सकिनेछ ।
यदि कोही जान चाहे भने कसरी सेवा दिनुहुन्छ ?
सामान्य रिसोर्ट सरहकै दरमा हामीले सेवा दिने गर्दछौँ । धुलिखेल नगरकोट रेन्जकै सेवा सुविधा र दर हुने गर्दछ । थप अरु कुनै महँगो छैन । धुलिखेलतिरभन्दा अझै सस्तो छ भन्ने हाम्रो दाबी छ ।
पर्यटक आगन्तुकको प्रतिक्रिया के छ ?
लोकेशन अर्थात् स्थानको हिसाबले हामी एकदमै राम्रो स्थानमा छौं । केही विदेशी पर्यटकले समय समयमा प्रतिक्रिया पनि दिने गर्दछन् । कतिपयले त संसार धेरै घुमियो तर यहाँ आउँदा जति आनन्द हामीलाई काहीँ पनि भएन भन्ने प्रतिक्रिया पनि पाइने गरिएको छ । त्यो हाम्रो लागि गौरवको कुरा हो । खुसीको कुरा हो । सबैलाई प्रकृति र सबै ठाउँ मनपर्छ भन्ने पनि हुँदैन । त्यहाँ पुगेका ९५ प्रतिशतभन्दा बढी पर्यटकहरू चाहीँ खुसी नै भएर फर्किने गरेका छन् ।
अन्तिममा के भन्न चाहनुहुन्छ ?
विशेषगरी पर्यटन क्षेत्र त्यसमा पनि होटलहरुमा रिफ्रेसमेन्टको लागि जाने हो । हामी हप्ता, महिना, वर्षौंभरि काम गर्छौं । त्यसक्रममा हामीमा भएका तनावहरू बिसाउनको लागि, घुम्नका लागि र विभिन्न स्थानमा जाने गर्दछौँ । त्यस्तै एक उत्कृष्ट गन्तव्य हो थुम्की रिसोर्ट । त्यहाँ गएर रिफ्रेसमेन्ट भएर आउने हो । परिवारसँग रमाउन जाने हो । साथीभाइहरूसँग रमाउन जाने हो । त्यहाँ गएर पूर्णरूपमा रमाएर रिचार्ज भएर काठमाडौँ वा आफ्नो गन्तव्यमा फर्किने हो । त्यो वातावरण थुम्की रिसोर्टबाट बन्नेछ । त्यसका लागि थुम्की रिसोर्टमा आउन म सबैलाई आह्वान गर्दछु ।
(न्यौपाने आर्थिक क्षेत्रमा लामो अनुभव हासिल गरेका व्यक्ति हुन् ।)
