अर्थ प्रणाली 
काठमाडौं । नेपाली युवा उद्यमी मञ्च (एनवाईईएफ) काठमाडौं च्याप्टरले आयोजना गरेको ग्लोबल आईएमई बैंकद्वारा प्रस्तुत एनवाईईएफ स्टार्टअप अवाड्र्स ४.० सम्पन्न भएकोे छ । नेपाली स्टार्टअपहरूको नवप्रवर्तनात्मक भावना र उद्यमशील उत्कृष्टताको उत्सव स्वरूप आयोजित यस कार्यक्रम काठमाडौंमा सम्पन्न भएको हो ।
यस वर्षको विजेता डीएल अपलोडलाई ४,००,००० नगद पुरस्कारसहित प्रतिष्ठित स्टार्टअप अवार्ड प्रदान गरिएको छ ।
उपविजेताको रुपमा मेल्ट डाउनलाई २,००,००० नगद पुरस्कार प्रदान गरियो भने खेतीपाती अर्गानिक्सले अडियन्स पिक अवार्ड जित्दै १,००,००० रुपैयाँ प्राप्त गरेको छ ।
राष्ट्रिय योजना आयोगका उपाध्यक्ष प्रा.डा. शिवराज अधिकारी र नेपाल उद्योग वाणिज्य महासंघका अध्यक्ष चन्द्र प्रसाद ढकालको उपस्थितिमा कार्यक्रम सम्पन्न भएको हो ।
कार्यक्रममा अध्यक्ष चन्द्रप्रसाद ढकालले स्टार्टअपहरूलाई आर्थिक वृद्धि र नवप्रवर्तनमा महत्वपूर्ण भूमिका खेल्ने विषयमा जोड दिए । प्रमुख अतिथि प्रा.डा. शिवराज अधिकारीले स्टार्टअपहरूलाई सफल बनाउन अनुकूल नीतिनिर्माणको आवश्यकता रहेको औँल्याए ।
एनवाईईएफ काठमाडौं च्याप्टरका अध्यक्ष अभिमन्यु गोल्छाले कार्यक्रमलाई कुशल नेतृत्वद्वारा सञ्चालन गरेका थिए । एनवाईईएफ स्टार्टअप अवाड्र्स ४.० ले नवीनता र उद्यमशीलतालाई प्रेरणा दिने उत्कृष्ट मञ्च भएको उनको भनाइ छ ।
नेपालका उत्कृष्ट स्टार्टअपहरूको प्रदर्शन
कार्यक्रममा निम्न सात उत्कृष्ट स्टार्टअपहरू अन्तिम चरणमा पुगेका थिएः
डीएल अपलोड
मेल्ट डाउन
खेतीपाती अर्गानिक्स
ज्ञान बजार
ई–कागजपत्र
माच २० अर्बिटल्स
स्मार्ट पालिक
यी सबै फाइनलिस्टहरूले आफ्नो नवीन सोच र उद्यमशील प्रतिभा प्रदर्शन गर्दै सहभागीहरूमा गहिरो छाप छोडेका थिए ।
