अर्थ प्रणाली 
काठमाडौं । काठमाडौंको भृकुटीमण्डपमा प्लास्टिकबाट निर्मित सामानहरूको चौथो प्रदर्शनी चौथो प्लास्ट नेपाल २०२४ एक्स्पो सुरु भएको छ । एक्स्पोको उद्योग वाणिज्य तथा आपूर्ति मन्त्री दामोदर भण्डारीले उद्घाटन गरेका हुन् । प्लास्टिकजन्य वस्तुको उत्पादन, प्रशोधन, बिक्री गर्दै आएका उद्योगहरुको गैरनाफामुलक संगठन प्लाष्ट नेपाल फाउन्डेसनको आयोजनामा एक्स्पो भइरहेको हो ।
मंसिर १५ गतेसम्म चल्ने एक्स्पोको उद्घाटन गर्दै मन्त्री भण्डारीले कानुनमा देखिएका समस्या समाधान गर्दै लगानी गर्ने र लगानी आउने वातावरण निर्माणमा सरकार प्रतिबद्ध रहेको बताए । प्लास्टिकजन्य पदार्थले गर्ने असर न्यूनिकरणमा सघाउन उनले उद्योगीहरुलाई आग्रह गरे ।
उद्घाटन कार्यक्रममा प्लास्ट नेपाल फाउन्डेसनका अध्यक्ष दीपक श्रेष्ठले सकारात्मकरुपमा प्लास्टिकलाई लिनुपर्ने बताए । प्लास्टिक नहुँदा वन जंगल नास गर्नुपर्ने अवस्था आउँदथ्यो भने प्लाष्टिकको प्रयोगका कारण यसको संरक्षण भइरहेका कारण यसले पर्यावरण जोगाइरहेको विषयबारे सबैले बुझ्नुपर्ने उनले बताए । राज्यले पुनः प्रशोधन गर्ने उद्योगलाई सघाउनुपर्ने धारणा राख्दै उनले पुन प्रयोगमा आउनसक्ने सामान उत्पादन गर्न हौस्याएमा थप कमाइ गर्न सकिने बताए । अन्तशुल्कका कारण स–साना उद्योगीले हिसाब राख्न नसकेको, दण्ड जरिवाना ठूलो भएको भन्दै त्यसलाई हटाउनुपर्ने माग उनको रहेको छ । स्वदेशमा उत्पादन हुने वस्तुमा लाग्ने अन्तशुल्क हटाउन अध्यक्ष श्रेष्ठले जोडदार माग गरेका छन् । उद्योगलाई बचाएर रोजगारी सिर्जना र आयात प्रतिस्थापन हुनसक्नेतर्फ लाग्नुपर्ने भन्दै उनले सरकारको ध्यानाकर्षण गराएका छन् ।
कार्यक्रममा नेपाल उद्योग वाणिज्य महासंघका अध्यक्ष चन्द्र प्रसाद ढकालले कानुनको संशोधनमार्फत लगानीको वातावरण बनाउनुपर्ने बताए । यस्तै नेपाल चेम्बर अफ कमर्सका अध्यक्ष कम्लेशकुमार अग्रवालले नेपाली उत्पादनमा आवश्यक सम्पूर्ण कच्चापदार्थ आयातमा भन्सार दर घटाउनुपर्ने माग राखे । त्यसैगरी प्लास्टिक र प्लास्टिकका सामान उत्पादन गर्नेहरुका लागि नेपालमा वातावरण बनाउने नीति ल्याउनुपर्ने अग्रवालले बताए । यता नेपाल उद्योग परिसंघका अध्यक्ष राजेश अग्रवालले प्लास्टिकजन्य वस्तुलाई पुनः प्रयोग गर्न सकिने भएकाले नेपालमा पुनः प्रयोग गर्ने व्यवस्थाको वातावरण निर्माणका लागि सरकारसँग आग्रह गरे ।
एक्स्पोमा नेपाल, भारत, बंगलादेश, चीन लगायतका विभिन्न उत्पादक, कच्चा पदार्थ आपूर्तिकर्ता र मेशिन उपकरण आपूर्तिकर्ता तथा सेवा प्रदायकहरुको उपस्थिति रहेको छ । एक्स्पोमा १५० भन्दा बढी स्टलमार्फत प्रदर्शनी भइरहेका छन् ।
नेपालमा प्लास्टिकजन्य वस्तुको उत्पादन र उपयोग तथा उपयोगपछिको व्यवस्थापन समेतका विषयमा प्रचार प्रसार गरी जनचेतना जगाउने तथा विश्व बजारका नवीनतम प्रविधिको विकासलाई नेपाली बजारमा भित्र्याउन समेत एक्स्पोले सहयोग पुर्याउने आयोजकको विश्वास रहेको छ ।
