अर्थ प्रणाली 
काठमाडौं । वैदेशिक रोजगार विभागको विवरण अनुसार विभागको विभिन्न शाखाहरूबाट कार्यसम्पादन र उजुरी सुनुवाइ भएको छ। मुद्दा तथा अनुसन्धानमा सक्रियतापछि विभागको मुद्दा तथा अनुसन्धान शाखामा सोमबार एकैदिन २६ वटा नयाँ जाहेरी दर्ता भएका छन्। सोही अवधिमा शाखाले २५ वटा पक्राउ पुर्जी जारी गरेको छ भने २६ वटा पक्राउ अनुमति दिएको छ । विभिन्न मुद्दामा संलग्न ७ जनालाई पक्राउ गरी विभागमा उपस्थित गराइएको छ। साथै, ३ वटा मुद्दामा मिलापत्र गरिएको छ भने पक्राउ अनुमति, बैंकलाई लेखिएका पत्र र अभियोग पत्र लगायत गरी कुल ७९ वटा पत्रहरू चलानी भएकाे विभागले जनाएकाे छ।
विभागका अनुसार उद्धार तथा समन्वय शाखाको विवरण अनुसार ६ वटा नयाँ उजुरी दर्ता भएका छन्। शाखाले ६ जनाको उद्धार गरेको छ भने ४ वटा क्षतिपूर्तिका विषय टुंगो लगाएको छ। उद्धार र क्षतिपूर्ति दुवै जोडिएका ३ वटा उजुरीमा कार्य भएको छ भने जम्मा ८ वटा मुद्दा फछ्र्यौट गरिएको छ। यसका साथै, द्विपक्षीय छलफल र फोन फलोअपका माध्यमबाट पनि पीडितका समस्या समाधान गर्ने प्रयास जारी राखिएको छ।
गुनासो व्यवस्थापन र कल सेन्टर सरकारी संयन्त्र हेलो सरकारमार्फत प्राप्त ६९ वटा गुनासोमध्ये ३५ वटाको समाधान गरिएको छ भने बाँकी ३४ वटालाई सम्बन्धित शाखामा पठाइएको छ । त्यसैगरी विभागको आफ्नै कल सेन्टरमा प्राप्त १७७ वटा गुनासोमध्ये १५८ वटाको तत्काल समाधान गरिएको छ।
बाँकी १९ वटा गुनासोहरू हाल अध्ययनको प्रक्रियामा रहेकाे विभागकाे भनाइ छ ।
