अर्थ प्रणाली 
रुपन्देही। रुपन्देहीस्थित फूड च्वाइस फुड्स प्रालिले उत्पादन गरेको ‘फ्रोजन फ्रेन्च फ्राइज’ पहिलोपटक संयुक्त राज्य अमेरिका निर्यात भएको छ । भैरहवा भन्सार कार्यालयमार्फत अमेरिकास्थित जेन्टको एलएलसीलाई पठाइएको यो निर्यातको कुल मूल्य ५४ लाख ८८ हजार १ सय ५८ रुपैयाँ रहेको छ ।
भन्सार कार्यालयले दिएको जानकारी अनुसार कुल दुई कन्टेनरमा ४३ हजार ५ सय २० किलोग्राम ‘फ्रोजन फ्रेन्च फ्राइज’ अमेरिका निर्यात भएको हो । भैरहवा भन्सार कार्यालयले जारी गरेको विज्ञप्तिमा नेपालमा उत्पादित खाद्य वस्तुले अमेरिकाजस्तो अत्याधिक प्रतिस्पर्धात्मक बजारमा प्रवेश पाएकोमा खुसी व्यक्त गरिएको छ । यस निर्यातबाट नेपाली उद्योगको विकास, वैदेशिक मुद्रा आर्जन र उद्यमशीलता निर्माणमा महत्वपूर्ण टेवा पुग्ने विश्वास भन्सार कार्यालयको छ । अमेरिकी बजारमा नेपाली ‘फ्रोजन फ्रेन्च फ्राइज’ को यो प्रवेशले भविष्यमा थप नेपाली उत्पादनहरूको विश्वबजार विस्तारको ढोका खोल्ने विश्वास पनि कार्यालयले गरेको छ ।
भैरहवा भन्सार कार्यालयले निर्यात प्रवद्र्धनका लागि आवश्यक सेवा सुविधा, सूचनाको पहुँच र प्रक्रियागत सहजतामा निरन्तर सुधार गर्न प्रतिवद्ध रहेको जनाएको छ । साथै, निजी क्षेत्र, उत्पादनकर्ता, ढुवानी तथा गुणस्तर नियमन निकायसँगको सहकार्यलाई अझ सुदृढ बनाउँदै लैजानेतर्फ प्राथमिकतामा रहने प्रतिबद्धतासमेत जनाएको छ ।
