अर्थ प्रणाली 
काठमाडौं । बिहीबार बिहानै राता राता आँखा पार्दै क्रिकेट फ्यानहरु चिया चौतारीमा भेटिन्छन् र गफ सुरु हुन्छ नेपाली क्रिकेटको । चियाको अर्डरसँगै खुसी मुद्रामा रहेका उनीहरु खेलको समीक्षा गर्न थाल्छन् र भन्छन् ओई यसपाली त नेपालले पक्कै केही गर्नेछ । नेपाल आइसिसी टी–२० विश्वकपमा छनोट भएसँगै त उनीहरुको खुसीको सीमा नै छैन ।
ओमानमा जारी एसिया तथा इस्ट एसिया प्यासिफिक छनोटअन्तर्गत सुपर सिक्सको खेलको चर्चा हो यो । बुधबार संयुक्त अरब इमिरेट्स (युएई) ले सामोआलाई ७७ रनले हराएपछि नेपालले विश्वकप प्रवेश गरिहाल्यो । योसँगै नेपाल तेस्रो पटक विश्वकपमा पुगेको हो । नेपालले यसअघि सन् २०१४ र २०२४ को विश्वकप खेलिसकेको छ । त्यहीबीचमा कोही राजनीतिक दलका नेताहरुलाई गाली गर्न पनि पछि पर्दैनन् उनीहरु । यसपाली नेपालले लगातार दोस्रो पटक विश्वकप खेल्न लागेको हो । अब नेपालले भारत र श्रीलंकामा सन् २०२६ मा हुने टी–२० विश्वकप खेल्नेछ ।
नेपालसँगै आयोजक ओमान पनि विश्वकपमा छनोट भएको छ । नेपाल र ओमानले दुई खेल अगावै विश्वकपमा स्थान बनाएका हुन् । जितका लागि यूएईले दिएको दुई सय २६ रनको लक्ष्य पछ्याएको सामोआ पूरै २० ओभरमा ८ विकेटको क्षतिमा १४८ रनमा समेटिएको हो । अब युएई र जापानमध्ये एक टोली विश्वकपमा छनोट हुनेछ ।
सुपर सिक्समा नेपालले बुधबार राति ओमानसँग प्रतिस्पर्धा गरेको छ ।
त्यहाँ चियाको चुस्कीसँगै हँसिलो मुद्रामा ओमानसँगको खेलको चर्चा हुनथाल्छ । कोही भन्छन् अब त सिओर भइसक्यो नेपालले उपाधी नै जित्छ ।
तारिफ कुशल भुर्तेल र गुलसन झाको हुन्छ । हुन पनि हो । कुशल भुर्तेलको सानदार ब्याटिङ र गुलशन झाको उत्कृष्ट बलिङसँगै आईसीसी टी–२० विश्वकप एसिया र इस्ट एसिया प्यासिफिक छनोटको उपाधिनजिक नेपाल पुगेको छ । बुधबार सम्पन्न सुपर सिक्सको तेस्रो खेलमा नेपालले ओमानलाई ३८ रनले पराजित गर्दै आफ्नो अपराजित यात्रा कायमै राखेपछि खेल समर्थकको खुसीको सीमा नरहेको हो । उनीहरु बीच बीचमा भन्छन्, ‘अब सामाओलाई त सिधै हराइहाल्छ नि नेपालले ।’ ओमानसँगको यो जितसँगै नेपालले ४ खेलबाट ८ अंक पु¥याएको छ ।
नेपालले समूह चरणबाटै २ अंक ल्याएको थियो । सुपर सिक्समा भने यूएईमाथि १ र कतारमाथि ५ रनको जित हात पारेको थियो । ओमानको अपराजित यात्रामा भने पूर्णविराम लागेको छ । समान खेलमा ६ अंक रहेको ओमान दोस्रो स्थानमा रहेको छ । अब नेपालले सामाओसँग र ओमानले जापानसँग खेल्नेछ ।
नेपालले जितका लागि ओमानलाई १५२ रनको लक्ष्य दिएको थियो । ओमानले ९ विकेट गुमाउँदै ११३ रन बनायो । नेपालका ओपनर कुशलले सर्वाधिक ६९ रन बनाए । ५१ बल खेलेका उनले ७ चौका र १ छक्का प्रहार गरेका थिए । अर्का ओपनर आसिफ शेख २४, गुलसन झा १८, आदिल अन्सारी १६ रनमा आउट भए ।
ओमानका नदिम खानले सर्वाधिक ४ विकेट लिए । ४ ओभर बलिङ गरेका उनले २० रन खर्चिए । सुफयान मेहमोद र जितेनकुमार रामदानीले समान दुई विकेट लिए । ओमानका विनायक सुकलाले सर्वाधिक रन बनाए । उनले खेलमा १ चौका र २ छक्का प्रहार गरेका थिए । मोहम्मद नादिम ३१ बलमा १ छक्का प्रहार गर्दै २५ रन बनाएर आउट भए । कप्तान जितेन्द्रसिंह १४ रनमा आउट हुँदा अन्यको ब्याट चल्न सकेन । नेपालका गुलशन झाले सर्वाधिक ३ विकेट लिए । ४ ओभर बलिङ गरेका उनले ३१ रन खर्चिए ।
सोमपाल कामी र नन्दन यादवले समान २ विकेट लिए । सन्दीप लामिछानेको नाममा समान १ विकेट रह्यो ।
