अर्थ प्रणाली 
काठमाडौं । कृषि तथा पशुपन्छी विकासमन्त्री रामनाथ अधिकारीले आगामी आर्थिक वर्षका लागि मन्त्रालयले अघि सारेका नीति तथा कार्यक्रम एवं वजेट तर्जुमा र प्राथमिकताका विषयकाे छलफललाई तिव्रता दिएका छन् । बिहीबार धादिङ जिल्लाका स्थानीय तहका प्रमुख तथा उपप्रमुखहरुसँग छलफल गरेका मन्त्री अधिकारीले आज काठमाडौंका स्थानीय पालिकाका प्रमुख तथा उपप्रमुखसँग छलफल गर्दैछन् ।
बिहीबार मन्त्रालयमा भएको छलफलमा धादिङ जिल्लाका २ नगरपालिका र ११ वटा गाँउपालिकाका प्रमुख तथा उपप्रमुख , मन्त्रालयका सचिवद्धय डा.गोविन्द प्रसाद शर्मा , डा.राजेन्द्र प्रसाद मिश्र लगायत सहभागी थिए । छलफलमा मन्त्री अधिकारीले सरोकारवाला सबैको सुझावका आधारमा मन्त्रालयले आगामी आर्थिक वर्षको कार्यक्रम र प्राथमिकता तय गर्ने बताए । ‘कृषि क्षेत्रको विकासका लागि स्थानीय सरकारको महत्वपूर्ण भूमिका हुने भएकाले स्थानीय तहबाट प्राप्त सुझावलाई मन्त्रालयले ग्रहण गर्ने छ,’ मन्त्री अधिकारीले भने ।
मन्त्रालयले काठमाडौं उपत्यकाभित्रका पालिकाका प्रमुख एवम् उपप्रमुखहरुसँग पनि यसै विषयमा आज मन्त्रालयमा छलफल आयोजना गरेको जानकारी दिँदै मन्त्री अधिकारीले आगामी आर्थिक वर्षका लागि मन्त्रालयले अघि सारेका कार्यक्रम र प्राथमिकतालाई स्थानीय सरकारले पनि अपनत्व लिनसक्ने वातावरण बन्न सकोस् भन्ने आफ्नो चाहना रहेको बताएका छन् । आगामी बजेटमा कृषि क्षेत्रमा अघि सारिने कार्यक्रमहरुलाई उत्कृष्ट बनाउन प्रयत्न गर्ने प्रतिवद्धता पनि मन्त्री अधिकारीले व्यक्त गरेका छन् ।
