अर्थ प्रणाली 
पोखरा । नेपाली मौलिक खान संस्कृति, पाककला तथा पर्यटन प्रवर्द्धनलाई अन्तर्राष्ट्रिय स्तरसम्म पुर्याउने उद्देश्यसहित नेपाली सेफ सोसाइटी गण्डकी प्रदेशको नयाँ कार्यसमिति सर्वसम्मत रूपमा गठन गरिएको छ। पोखरास्थित होटल म्याजेस्टिकमा सम्पन्न भेलाले ४० सदस्यीय गण्डकी प्रदेश कार्यसमिति चयन गरेको हो।
नेपाली सेफ सोसाइटी गण्डकी प्रदेश कार्यसमितिको अध्यक्षमा पूर्ण भक्त दाहाल चयन भएका छन् भने उपाध्यक्षमा गोविन्द खनाल, सचिवमा राजेश सुनार, कोषाध्यक्षमा झम्क प्रसाद ढकाल तथा संस्थापक कार्यसमिति सदस्यमा किशोर बास्तोला चयन भएका छन्।
त्यसैगरी कार्यसमिति सदस्यहरूमा राजेश धिमाल, पवन हमाल, भीम अधिकारी, रश्मि रोका मगर, अनुप बस्नेत र सन्तोष सुनार रहेका छन्।
यसैगरि सदस्यहरुमा रोशन गुरुङ, सुमन श्रेष्ठ, मोहन थापा, अनिल गुरुङ, रमेश सुनार, सुरज गुरुङ, सीताराम पौडेल, विकास वि.क, बालकुमार पहाडी, मोहन कुमार साह, हरिकृष्ण नेपाली, रूपक बर्दुवा, महेन्द्र गुरुङ, गणेश बहादुर बानियाँ, जितु मगर, बेनीराम रास्कोटी, ऋषिराम बास्तोला, प्रदीप दाहाल, चिज कुमार गुरुङ, भीम थापा मगर, अमिन सारु मगर, सुसन गुरुङ, प्रदिप दर्नाल रुपक बर्देवा रमेश विके तथा फडिन्द्र गुरुङ रहेका छन् ।
यतै सल्लाहकार मण्डलमा श्याम लाम्गाते संरक्षक सल्लाहकार, भगत श्रेष्ठ वरिष्ठ सल्लाहकार तथा तारा मगर र गोविन्द लामिछाने सल्लाहकार रहेका छन्।
उक्त कार्यक्रममा अन्तर्रास्ट्रिय सेफ सोसाइटीका केन्द्रीय अध्यक्ष अरुण अधिकारी, ईनास आबुधाबी च्याप्टरका क्षेत्रीय अध्यक्ष श्याम लाम्गातेसहित गण्डकी प्रदेशका ११ वटै जिल्लाबाट नेपाली सेफहरूको उल्लेखनीय सहभागिता रहेको थियो।
कार्यक्रमलाई सम्बोधन गर्दै अध्यक्ष अरुण अधिकारीले नेपाली भान्छे, कुक तथा सेफहरूको विश्व बजारमा छुट्टै पहिचान स्थापित भइसकेको बताए। उनले नेपाली सेफहरू अहिले युरोप, मध्यपूर्व, अमेरिका, अष्ट्रेलिया तथा एसियाका विभिन्न मुलुकमा आफ्नो क्षमता, मेहनत र सिर्जनशीलताका कारण चर्चित बन्दै गएको उल्लेख गरे।
उनका अनुसार नेपाली खानाको स्वाद, अनुशासन र कार्यकुशलताका कारण अन्तर्राष्ट्रिय होटल तथा रेस्टुरेन्ट क्षेत्रमा नेपाली सेफहरूको माग निरन्तर बढिरहेको छ। “आज नेपाली सेफहरू केवल श्रमिक होइनन्, नेपालका सांस्कृतिक दूतका रूपमा विश्वभर परिचित भइरहेका छन्,” अध्यक्ष अधिकारीले बताए।
उनले वैदेशिक रोजगारीलाई केवल सामान्य श्रममा सीमित नराखी दक्ष कुक तथा सेफ उत्पादनमा राज्यले प्राथमिकता दिनुपर्ने धारणा राखे। “यदि व्यवस्थित रूपमा कुक पेशासम्बन्धी तालिम दिएर दक्ष जनशक्ति विदेश पठाउने हो भने अहिलेको भन्दा दोब्बर रेमिट्यान्स नेपाल भित्र्याउन सकिन्छ,” उनले बताए।
अध्यक्ष अधिकारीले नेपाली युवालाई पाककला क्षेत्रमा आकर्षित गर्न सीप, तालिम र अन्तर्राष्ट्रिय अवसरसँग जोड्न आवश्यक रहेको उल्लेख गरे। उनले सरकार र निजी क्षेत्रबीच सहकार्य गरेर नेपाली पाककलालाई विश्वस्तरमा स्थापित गर्ने अभियानमा आफूहरू सक्रिय रहेको पनि जानकारी दिए।
“हामी नेपाल सरकारसँग सहकार्य गरेर अघि बढिरहेका छौं, आगामी दिनमा पनि नेपाली खानाको प्रवर्द्धन, पर्यटन विकास र दक्ष जनशक्ति उत्पादनका क्षेत्रमा संयुक्त रूपमा काम गर्नेछौं,” उनले भने।
पछिल्लो समय अध्यक्ष अधिकारीकै नेतृत्वमा नेपाली सेफहरूको अभियानले देश तथा विदेशमा उल्लेखनीय चर्चा पाउन थालेको छ। केही दिनअघि मात्रै झापामा विश्वभर रहेका नेपाली सेफहरूको सहभागितामा अन्तर्राष्ट्रिय स्तरको पाककला प्रतियोगिता तथा विविध कार्यक्रम सफलतापूर्वक सम्पन्न गरिएको थियो। उक्त कार्यक्रमले नेपाली खानाको प्रचारप्रसारसँगै नेपालको पर्यटन प्रवर्द्धनमा समेत सकारात्मक प्रभाव पारेको सहभागीहरूको भनाइ थियो।
अध्यक्ष अधिकारीले आगामी दिनमा नेपालका विभिन्न प्रदेश तथा विदेशमा समेत यस्ता कार्यक्रम विस्तार गर्ने तयारी भइरहेको जानकारी दिएका छन्।
सोसाइटीले नेपाली सेफहरूको हकहित संरक्षण, दक्षता विकास तालिम, राष्ट्रिय तथा अन्तर्राष्ट्रिय कुकरी प्रतियोगिता, खाद्य संस्कृति संरक्षण, पर्यटन प्रवर्द्धन तथा विश्वभर रहेका नेपाली सेफहरूबीच सहकार्य विस्तार गर्ने लक्ष्य लिएको जनाएको छ।
