अर्थ प्रणाली 
हेटौंडा । हेटौंडा औद्योगिक क्षेत्रस्थित एन्टारटिक बिस्कुट प्रालिले गैरकानुनी तवरबाट ९७ जना श्रमिकलाई निष्काशन गरेको विरोधमा थालिएको आन्दोलन सातौँ दिन पनि जारी रहेको छ । कालोझण्डासहित विभिन्न नारासहित विरोधमा उत्रिएका श्रमिकहरुले आन्दोलनलाई जारी राखेका हुन् । निष्काशित श्रमिकको पुनर्बहालीका माग गर्दै नेकपा एमाले सम्बद्ध नेपाल ट्रेड यूनियन महासंघ (जिफन्ट) आबद्ध समग्र उद्योग ट्रेड यूनियन नेपालको अगुवाईमा भएको आन्दोलन थप चर्किँदै गएको छ ।
श्रमिकहरुले दैनिक एक घण्टा शान्तिपूर्ण धर्ना एवं विरोध कार्यक्रमलाई निरन्तरता दिँदै व्यवस्थापन पक्षलाई माग पुरा गराउन दबाब दिइरहेका छन् । उनीहरुले मानसिक हिंशा विरोधी गतिबिधि बन्द गर, कानुनी शासन स्थापित गर, उद्योगीको मतियार होशियार, मर्यादित ज्याला निर्धारण गर लगायतका नारा लगाएर आन्दोलन थप चर्काउँदै लगेका हुन् । त्यसैगरी उनीहरुले श्रम कार्यालय होशियार भन्दै खबरदारीसमेत गरेका छन् ।
हाल भइरहेको विरोध एवं आन्दोलनलाई नेपाल बिजुली, पेन्टर, प्लम्बर तथा निर्माण मजदुर यूनियन र नेपाल यातायात स्वतन्त्र मजदुर संगठन जिल्ला कमिटी मकवानपुरले छुट्टाछुट्टै विज्ञप्ति प्रकाशित गरी ऐक्यबद्धता जनाएका छन् भने जिफन्टका २३ घटक संगठनको साथ र समर्थन रहेको छ ।
विरोध सभामा नेपाल ट्रेड यूनियन महासंघ (जिफन्ट) बागमती प्रदेशका अध्यक्ष रामहरि नेपाल, उपाध्यक्ष अर्जुन अर्याल लगायत विभिन्न घटकका नेताहरुको सहभागिता रहेको छ । जिफन्ट प्रदेशले यो आन्दोलन एउटा कारखानाका श्रमिकहरुको मात्र नभएर जिफन्ट र योसँग आबद्ध २३ वटै घटक यूनियनहरुको साझा आन्दोलन रहेको भन्दै शान्तिपूर्ण दबाब एवं अन्दोलनलाई वेवास्ता गरिए ठूलो मूल्य चुकाउनुपर्ने चेतावनीसमेत दिएका छन् ।
कानुनको उल्लंघन गरेर अनुचित श्रम अभ्यास गर्ने व्यवस्थापकको व्यवहार नसच्चिएसम्म नछाड्ने उनीहरुको चेतावनी छ । यसबारे संसदमा समेत आवाज उठ्दै गएको छ । श्रमिकको शान्तिपूर्ण आन्दोलन विस्तारै भुसको आगो झैं ठूलो बन्दै गएको देखिन्छ ।
आन्दोलनलाई व्यवस्थित बनाउन समग्र उद्योग ट्रेड यूनियन नेपालका केन्द्रीय अध्यक्ष आनन्द थामीको संयोजकत्वमा नेपाल ट्रेड यूनियन महासंघ (जिफन्ट) बागमती प्रदेश अध्यक्ष रामहरि नेपाल, उपाध्यक्ष अर्जुन अर्याल र अन्य सदस्यहरुमा धर्म बस्नेत, भवानी शर्मा, सन्तोष पौडेल, लालकृष्ण प्याकुरेल, केशव अधिकारी र बुद्ध विक रहेको आन्दोलन परिचालन स्टेरियङ कमिटी निर्माण गरी माग पुरा नभएसम्म कारखानामा आन्दोलन थप चर्काउने उनीहरुको चेतावनी छ ।
यसैबीच श्रम कार्यालय हेटौंडाको मध्यस्थतामा व्यवस्थापन पक्ष र श्रमिक प्रतिनिधिबीच वार्ता हुँदैछ ।
