अर्थ प्रणाली 
काठमाडौं । अँग्रेजी नयाँ वर्ष सन् २०२५ को पहिलो दिनमै नेपाली बजारमा डलरको मूल्यले पुनः नयाँ रेकर्ड बनाएको छ।
नेपाल राष्ट्र बैंकका अनुसार आज डलरको बिक्रीदर १३७ रुपैयाँ २९ पैसा रहेको छ । यसको अर्थ १ अमेरिकी डलर प्राप्त गर्न १३७ रुपैयाँ २९ पैसा नेपाली रुपैयाँ खर्च गर्नु पर्नेछ । खरिददर भने १३६ रुपैयाँ ६९ पैसा रहेको छ।
यसरी हेर्दा अमेरिकी डलर किन्नका लागि हालसम्मकै बढी नेपाली रुपैयाँ तिर्नुपर्दछ । अथवा अर्को भाषामा भन्नुपर्दा नेपाली रुपैयाँ अहिलेसम्मकै कमजोर बन्न पुगेको हो ।
यसअघि पुस १२ गते शुक्रबार डलरको बिक्रीदर १३६ रुपैयाँ ५६ पैसा र खरिददर १३७ रुपैयाँ १६ पैसा रहेको थियो।
त्यसअघि गत बुधबार डलरको बिक्रीदर १३६ रुपैयाँ ६३ पैसा र खरिददर १३५ रुपैयाँ ०३ पैसामा नयाँ रेकर्ड बनेको थियो । त्यस्तै गत मंगलबार डलरको बिक्रीदर १३६ रुपैयाँ ५० पैसा र खरिददर १३५ रुपैयाँ ९० पैसामा नयाँ रेकर्ड बनेको थियो ।
पुस ५ गते डलरको बिक्रीदर १३६ रुपैयाँ ४२ पैसा र खरिददर १३५ रुपैयाँ ८२ पैसा निर्धारण भएर नयाँ रेकर्ड कायम गरेको थियो । पुस ४ गते बिक्रीदर १३६ रुपैयाँ २३ पैसा र खरिददर १३५ रुपैयाँ ६३ पैसामा डलर मूल्यले रेकर्ड बनाएको थियो।
पुस ३ गतेका लागि नेपाल राष्ट्र बैंकले डलरको बिक्रीदर १३६ रुपैयाँ १४ पैसा तोकेको थियो भने खरिददर १३५ रुपैयाँ ५४ पैसा रहेको थियो । पुस २ गते मंगलबार डलरको बिक्रीदर १३६ रुपैयाँ ९ पैसा र खरिददर १३५ रुपैयाँ ४९ पैसा रहेको थियो ।
डलरको मूल्य बढ्दा विदेशमा काम गर्ने नेपालीले पठाउने रेमिट्यान्स आम्दानी बढ्ने हुन्छ । किनकि डलरमा पठाएको रेमिट्यान्सको नेपालमा धेरै पैसा आउँछ । पर्यटन आम्दानीमा वृद्धि हुनेछ । निर्यात गर्ने आम्दानीमा पनि लाभ लिन सकिनेछ ।
अर्कोतिर नेपाल आयातमा आधारित मुलुक भएकाले डलरको भाउ बढ्दा आयातित वस्तु तथा सामानको मूल्य भने बढ्न पुग्छ । यसले बजार महँगीलाई थप बढ्ने बाटोतर्फ अगाडि बढाउनेछ र बजार महँगी हुन सक्नेछ । आयात महँगो पर्न जाँदा विदेशी मुद्रा संचितिमा चाप पर्न सक्दछ ।
डलरको मूल्य बढेपछि नेपालले डलरमा तिर्नुपर्ने सावाँ र ब्याज बढ्न पनि जाने हुँदा नेपाललाई थप आर्थिक भार पर्न सक्दछ ।
