अर्थ प्रणाली 
काठमाडौं । देशकै सबैभन्दा ठूलो ४५६ मेगावाटको माथिल्लो तामाकोशी जलविद्युत आयोजनालाई यो साताभित्रै अंशिकरुपमा संचालनमा ल्याउने तयारी गरिएको छ ।
गत असोजमा गएको बाढीपहिरोका कारण बन्द आयोजनालाई यो साताभित्रै संचालनमा ल्याउने तयारी भइरहेको हो । यसका लागि धमाधम काम भइरहेको छ । आयोजनालाई पूर्णरुपले संचालनमा ल्याउन लामो समय लाग्ने भएपनि अहिले आंशिकरुपमा संचालनमा ल्याउने तयारी गरिएको आयोजनाले जनाएको छ ।
आयोजनाका अनुसार सुरुमा करिब १७० मेगावाट विद्युत उत्पादनमा ल्याइनेछ । रोल्वालिङ खोला जलविद्युत आयोजना निर्माण गरिरहेको कम्पनीले माथिल्लो तामाकोशी आंशिकरुपमा संचालनमा ल्याउनेगरी काम गरिरहेको हो।
असोज १० देखि १२ गतेसम्मको अधिक वर्षा र बाढीपहिरोपछि आयोजनाको कन्ट्रोल भवन, सेटिङ बेसिन, कल्भर्ट, हाइड्रोमेकानिकल र इलेक्ट्रोमेकानिकल उपकरण, प्रसारण लाइन, बाँधस्थल प्रवेश मार्ग लगायतमा १ अर्ब ८० करोड रुपैयाँ बराबरको क्षति भएको नेपाल विद्युत प्राधिकरणको एक अध्ययनले देखाएको छ।
यसैबीच आयोजनालाई पूर्णरुपले संचालनमा ल्याउन ८ देखि १० महिनासम्म लाग्नसक्ने अनुमान गरिएको छ ।
