अर्थ प्रणाली 
काठमाडौं । एक्मी इन्जिनियरिङ्ग कलेज नेविसंघ इकाई समिति सीतापाइलाकी पूर्व उपसभापति दिव्या थापाको सम्झनामा प्रथम दिव्या थापा स्मृति अन्तर कलेज फुटसल प्रतियोगिता–२०८१ आयोजना भएको छ ।
कुलेश्वरमा रहेको फुटसलमा नेविसंघ इकाई पूर्व उपसभापति थापाको सम्झनामा प्रतियोगिता आयोजना भएको हो ।
कांग्रेस नेत्री लक्ष्मी खतिवडाको उपस्थितिमा प्रतियोगिता गरिएको हो ।प्रतियोगिता एक्मी इन्जिनियरिङ कलेज नेविसंघ ईकाइका सभापति आर एन तामाङको सभापतित्वमा भएको थियो । प्रतियोगिताको उद्घाटन कार्यक्रममा दिव्यकी बाबाआमा र सबै साथीहरु शोकाकुल भएका थिए ।
सो अवसरमा मन्तव्य राख्दै दिव्यको बाबा एवं ग्यास बिक्रेता महासंघ नेपालका अध्यक्ष चन्द्र थापाले छोरीलाई इन्जिनियर बनाउने ठूलो धोको अधुरै भएको बताएका थिए। दिव्य सानैदेखि नै सामाजिक काम र विभिन्न क्रियाकलापमा सक्रिय हुने गरेको स्मरण गर्दै थापाले उनी सबैमाझ नभए पनि उनले गरेको गतिविधि सधैँ सम्झन योग्य रहेको बताए ।
दिव्याको सम्झनामा उनका साथीहरुले गरेको प्रतियोगिताले शोकलाई शक्तिमा बदल्न मद्दत पुगेको धारणा परिवारले राखेको छ । नेविसंघ एक्मी कलेज इकाइ सितापाइलासँग आगामी दिनमा थप सहकार्य गर्दै जाने थापाको भनाइ रहेको छ ।
दिव्याले पढाइको शिलशिलामा आत्महत्याको बाटो रोजेको र आगामी दिनमा अरु पनि यस्ता घटना हुन नदिने हिसाबले सरकारले विद्यालय तहदेखि विभिन्न अभिमुखीकरण कार्यक्रम गर्नुपर्ने दिव्याको परिवारले जनाएको छ ।
प्रतियोगिता तीन दिनसम्म चल्नेछ ।
