अर्थ प्रणाली 
काठमाडौं । संस्कृति, पर्यटन तथा नागरिक उड्डयनमन्त्री बद्री पाण्डेले हालसम्म भएका हवाई दुर्घटनाबारे बनेका छानबिन समितिले निकालेका निष्कर्ष र ती समितिले औँल्याएका विषयबारे अध्ययन गर्न एक उच्च स्तरीय छानबिन समिति बनाउनुपर्ने आवश्यकता औंल्याएका छन् ।
सौर्य एयरलाइन्सको जहाज दुर्घटनामा दिवङ्गतहरूको ४५औँ दिनको पुण्य तिथिको सन्दर्भमा आइतबार काठमाडौंमा आयोजित श्रद्धाञ्जली सभा तथा नेपालमा हवाई सुरक्षा विषयक कार्यक्रममा मन्त्री पाण्डेले भने, ‘‘हवाई दुर्घटनाबारे विगतमा थुप्रै अलग–अलग अध्ययन र अनुसन्धान भएका छन् । तिनीहरूलाई एकीकृतगरेर एक ठाउँमा राख्नु पर्ने छ ।’ ‘नागरिक उड्डयन क्षेत्रलाई सुरक्षित पार्नका लागि न्यायिक क्षेत्रका व्यक्तिको संयोजकत्वमा उच्चस्तरीय छानबिन समिति बनाउनेछौँ । त्यस समितिले अध्ययन गरेका कुरालाई सरकारले समेत शिरोधार्य गर्नेछ।’ उनले भने ।
मन्त्री पाण्डेले हवाई क्षेत्रलाई सुरक्षित बनाउनका लागि नियामक निकाय र सेवा प्रदायक निकायलाई छुट्याउने गरी ल्याएको विधेयक अर्थ, कानुन हुँदै मन्त्रालय पुगेको बताए । सो विधेयक मन्त्रिपरिषद् मार्फत संसदमा पेस गरिने उनले बताए । मन्त्री पाण्डेले हवाई ऐनलाई समय सापेक्ष हुनेगरी परिमार्जन गरिने पनि बताए ।
