अर्थ प्रणाली 
काठमाडौं । विद्युत नियमन आयोगले डेडिकेटेड तथा ट्रङ्कलाइन बक्यौतामा काटिएको छ उद्योगको बिजुली जडान गर्न नेपाल विद्युत प्राधिकरणलाई निर्देशन दिएको छ । लोडसेडिङका समयमा डेडिकेटेड तथा ट्रङ्कलाइन विद्युत प्रयोग गरेर प्रिमियमबापतको रकम तिर्न अटेरी गरेको भन्दै छ उद्योगमा प्राधिकरणले विद्युत् आपूर्ति विच्छेद गरेकोमा आयोगले उक्त निर्देशन दिएको हो ।
आयोगले विद्युत वितरणकर्ता र ग्राहकबीच विवाद भएमा विवाद समाधान हुनुभन्दा अघि विद्युत विच्छेद गर्नु गैरकानुनी हुने भन्दै काटिएको पत्र प्राप्त भएपश्चात् तत्काल जडान गर्न प्राधिकरणलाई निर्देशन दिएको हो । आयोगको उपभोक्ता हित संरक्षणसम्बन्धी निर्देशिका २०८० को दफा १३ को उपदफा १० को व्यवस्था अनुसार उद्योगमा काटिएको विद्युत आपूर्ति तत्काल सुचारु गर्न निर्देशन दिइएको हो ।
विद्युत सेवा विच्छेद गरिएको भन्दै छ उद्योगीले शुक्रबार आयोगमा निवेदन पेस गरेको र नियमसंगत काम गर्न प्राधिकरणलाई भनिएको आयोगका अध्यक्ष डा. रामप्रसाद धितालले जानकारी दिएका छन् ।
डेडिकेटेड र ट्रङ्कलाइन सुविधा प्रयोग गरेपनि प्रिमियमबापतको शुल्क नतिरेको भन्दै नेपाल विद्युत प्राधिकरणले असार २५, २६ र २७ गते छ वटा उद्योगको विद्युत् आपूर्ति विच्छेद गरिदिएको थियो । प्राधिकरणले रिलायन्स स्पिनिङ मिल्स, घोराही सिमेन्ट, अर्घाखाँची सिमेन्ट, जगदम्बा सेन्थेटिक्स, हुलास स्टिल्स र जगदम्बा स्टिल्सको विद्युत काटिदिएको हो ।
