अर्थ प्रणाली 
सार्वजनिक ऋण व्यवस्थापन कार्यालयका अनुसार चालु आर्थिक वर्ष २०८०/८१ को जेठसम्ममा सरकारले तिर्न बाँकी ऋण २४ खर्ब ९ अर्ब ६९ करोड रुपैयाँ पुगेको छ । कार्यालयका अनुसार यो ऋण कुल गार्हस्थ्य उत्पादन (जीडीपी)को आधारमा ४२.२४ प्रतिशत पुगेको छ ।
कार्यालय प्रमुख दीर्घराज मैनालीका अनुसार जेठ मसान्तसम्ममा तिर्नुपर्ने दायित्वअन्तर्गत आन्तरिक ऋण ११ खर्ब ९२ अर्ब ४८ करोड र वाह्य ऋण १२ खर्ब १७ अर्ब २१ करोड पुगेको छ ।
२०८० असार मसान्तमा २२ खर्ब ९९ अर्ब ३५ करोड रहेको ऋण बढेर २४ करोडमाथि पुगेको हो ।
सरकारले चालु आर्थिक वर्षको ११ महिनामा ३ खर्ब ७ अर्ब ६७ करोड रुपैयाँ सार्वजनिक ऋण लिएको छ । यस अवधिमा १ खर्ब ९७ अर्ब ३२ करोड भुक्तानी भएको छ ।
सार्वजनिक ऋण व्यवस्थापक कार्यालयको तथ्याँकलाई आधार मान्दा प्रत्येक नेपालीको थाप्लोमा ८२ हजार ६ सय २६ रुपैयाँ ऋण लागेको छ । २०७८ को जनगणना अनुसार नेपालको जनसंख्या २ करोड ९१ लाख ६४ हजार ५७८ जना रहेको छ । यो जनसंख्याले तिर्न बाँकी ऋणलाई भाग गर्दा प्रत्येक नेपालीलाई औसतमा साढे ८२ हजार ऋण लागेको हो ।
