अर्थ प्रणाली 
काठमाडौं । प्रथम सहकारी रोजगार मेला–२०८१ शुक्रबारदेखि ललितपुरमा सुरु भएको छ । राष्ट्रिय सहकारी महासंघ लिमिटेड नेपालको प्रमुख आयोजनामा तीन दिने रोजगार मेला सुरु भएको हो । भूमि व्यवस्था, सहकारी तथा गरिबी निवारण मन्त्री बलराम अधिकारीले उद्घाटन गरी मेलाको सुरुवात गरेका हुन् । सो अवसरमा मन्त्री अधिकारीले जो कोही व्यक्तिले पनि सहकारी खोल्ने र एटै व्यक्ति सहकारीमा रहेर काम गर्नु समस्याको प्रमुख कारण रहेको बताए । उनले सहकारीहरु स्थापनको उेश्यअनुसार चल्नुपर्ने भन्दै युवाको भावनाअनुरुप सहकारीले काम गर्न सकेमा धेरैलाई रोजगारी दिनसक्ने बताए ।
राष्ट्रिय सहकारी महासंघकी अध्यक्ष ओमदेवी मल्लले सहरमा समस्यामा परेका र केही बदमासी गर्नेहरुलाई मात्र सहकारी भन्ने मानसिकता हटाउनुपर्ने उल्लेख गर्दै उत्पादन र आर्थिक सबलीकरणमा काम गरिरहेको करिब ३२ हजार सहकारीलाई देख्न आग्रह गरिन् । उनले युवा पलायन रोक्न मेला सहयोगी हुने भन्दै सहकारीका सबै पक्षबारे जानकारी दिन मेला आयोजना गरिएको बताइन् । सहुलियत कर्जा पाउनुपर्ने, उत्पतिको प्रमाणपत्र पाउनुपर्ने लगायतका विषयमा उनले सरकारको ध्यानाकर्षण गराइन् ।
हाल देशभर ७४ लाख व्यक्तिहरु सहकारीमा आवद्ध भएको तथ्याँक प्रस्तुत गर्दै कार्यक्रममा १० लाख मानि प्रत्यक्ष वा अप्रत्यक्षपमा स्वरोजगार भएका जानकारी दिइएको थियो ।
सहकारी रोजगार मेलामा सहकारी क्षेत्रका २९ वटा स्टल रहेका छन् । स्टलमा देशभरबाट प्रतिनिधि हिसाबले अर्गानिक उत्पादनहरु राखिएको छ । मेलालाई पाँच हजारभन्दा बढीले अवलोकन गर्ने आयोजकको अनुमान रहेको छ ।
