अर्थ प्रणाली 
काठमाडौं । उद्योगी व्यवसायीहरुले दाल, चामलमा लगाएको अग्रिम आयकर फिर्ता नलिए आन्दोलनमा उत्रने चेतावनी दिएका छन् । बुधबार आयोजित पत्रकार सम्मेलनमा दाल, चामल र मैदा उद्योगका लागि कच्चा दाल गेडागुडीमा १० प्रतिशत धान र गहुँ आयातमा २.५ प्रतिशत लगाईएको अग्रिम आयकरले उद्योगलाई परेको प्रभाववारे धारणा राख्दै उद्योगी, व्यवसायीहले यस्तो चेतावनी दिएका हुन् ।
उद्योग वाणिज्य संघ विरगंजका अध्यक्ष अनिल अग्रवालले सरकारले उक्त अग्रिम आयकर फिर्ता नलिएमा उद्योगीहरु आन्दोलनमा आउने र कडा प्रतिवादमा उत्रने घोषणा गरे । उनले सरकारले तस्करीलाई प्रश्रय दिएको बताउँदै अग्रीम आयकर फिर्ता लिन आग्रह गरे । उनले भारतीय ट्रक सामान ल्याएर फर्कँदा बुझाउनुपर्ने १५ सय रुपैयाँ पनि पछि फिर्ता दिनुपर्ने बताए ।
नेपाल उद्योग वाणिज्य महासंघका उपाध्यक्ष हेमराज ढकालले सरकारले बजेटमार्फत लगाएको दाल, चामल तथा गेडागुडीको अग्रिम आयकर फिर्ता लिनुपर्ने बताए । उपयुक्त विकल्पका लागि आवश्यक छलफल गरेर समस्या समाधान गर्नुपर्ने उनले बताए ।
उनले भने ‘हामीले यसबारेमा महासंघमा पनि बहस गरिरहेकै छौं,दाल, चामल यी सबैमा लागेको अग्रिम कर हटाउनुपर्छ । यदि नहटाएमा देशका उद्योग बन्द हुनुका साथै राजस्व र रोजगारी दुबै बन्द हुनेछ ।’ सरकारले यसलाई गम्भिर रुपमा लिएर हटाउनुपर्नेमा उनको भनाइ छ ।
नेपाल दाल, चालम उद्योग संघका अध्यक्ष कुमुद दुगडले कच्चा पदार्थ आयातमा १० प्रतिशत अग्रिम आयकर लगाउँदा आयातित तयारी दाल, गेडागुडी र खुला सिमानाबाट आयात हुने दाल गेडागुडीसँग नेपाली उद्योगहरुले प्रतिस्पर्धा गर्न नसकी बन्द हुने अवस्थामा पुग्ने बताए । ‘कच्चा दाल आयातमा १० प्रतिशत अग्रिम आयकर थपिँदा स्वदेशी उद्योग चल्न सक्ने अवस्थामा रहँदैनन्,’ उनले भने, ‘अहिले नै मिलको कच्चा दाल र गेडागुडी आयातमा १० प्रतिशत भन्सार महसुल लागिरहेको छ । अब कुल आयातको अतिरिक्त १० प्रतिशत अग्रिम आयकर भन्सारमै बुझाउने व्यवस्था गरेको छ ।’ यसले नेपालका उद्योग बन्द हुनुका साथै नेपालीको भान्छा समेत महँगिन पुग्नेछ । दुगडले सरकारले तत्काल निर्णय फिर्ता नलिए नेपालका उद्योगहरु धराशायी हुने र दाल, चामल लगायतको मूल्य २० प्रतिशतसम्म महंगीने बताए ।
यता कृषि उद्यम केन्द्रका सभापति डिवी बस्नेतले चाल तथा गेडागुडीमा लगाईएको अग्रिम करले व्यवसायीको व्यवसाय मात्र नभई नेपालीको भान्छामा पनि प्रत्यक्ष असर गर्ने भन्दै तत्काल फिर्ता लिनुपर्नेमा जोड दिए ।
