अर्थ प्रणाली 
काठमाडौं ।चन्द्रागिरि इन्भेष्टमेन्ट ग्रुप लिमिटेडले १० करोड रुपैयाँ बराबरको १० लाख कित्ता प्राथमिक शेयर (आईपीओ) सर्वसाधारणका लागि निस्कासन गर्ने भएको छ । कम्पनीको पहिलो साधारणसभाले आईपीओ निष्काशन गर्ने प्रस्ताव पारित गरेको हो ।
कम्पनीको अधिकृत पूँजी ५० करोड रुपैयाँ छ ।
कम्पनीको साधारणसभाले चुक्ता पूँजीको ४ प्रतिशतका दरले नगद लाभांश वितरण गर्ने प्रस्ताव पनि पारित गरेको छ । यसैगरी साधारणसभाले ६ जना संचालक निर्विरोध चयन गरेको छ । निर्वाचनबाट निर्विरोध निर्वाचित हुने संचालकहरुमा राजन श्रेष्ठ, रामराजा आचार्य, प्रकाशमान श्रेष्ठ, धिरेन्द्र श्रेष्ठ, शंकर महर्जन र वीरेन्द्र श्रेष्ठ रहेका छन् ।
साधारणसभाले अध्यक्ष राजन श्रेष्ठले प्रस्तुत गरेको वार्षिक प्रतिवेदन र लेखा परीक्षकको प्रतिवेदन पारित गरेको छ ।
होल्डिङ कम्पनीका रुपमा रहेको चन्द्रागिरि इन्भेष्टमेन्ट ग्रुप लिमिटेडले इन्द्रेणी मस्रुम फार्म, द निलय होटल्स लिमिटेड, काउले भाइनियार्ड एग्रो, एभरेष्ट कलर र मेरो किसार्नलगायतका कम्पनीमा लगानी गरेको अध्यक्ष राजन श्रेष्ठले जानकारी दिएका छन् ।
