अर्थ प्रणाली 
काठमाडौं । नेपालका अभौतिक सम्पदालाई अन्तर्राष्ट्रिय सूचीमा दर्ता गर्ने प्रक्रिया अघि बढाइएको सरकारी भनाइ सार्वजनिक भएको छ । संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले नेपालमा दर्ता भएका अभौतिक सांस्कृतिक सम्पदालाई अन्तर्राष्ट्रिय अभौतिक सांस्कृतिक सम्पदाको सूचीमा दर्ता गर्ने प्रक्रिया अघि बढाइएको बताएका हुन् ।
राष्ट्रिय सभाको बैठकमा उनले अभौतिक सांस्कृतिक सम्पदा (संरक्षण) विधेयक, २०८१ माथि विचार गरियोस् भन्ने प्रस्तावमा उठेका प्रश्नहरूको जवाफ दिँदै नेपाल सरकारले अभौतिक सम्पदाको संरक्षण र सूचीकरणलाई प्राथमिकतामा राखेको स्पष्ट पारे । मन्त्री पाण्डेका अनुसार सरकारले कार्यविधि बनाई हालसम्म १०५ वस्तु अभौतिक सम्पदाको रूपमा दर्ता गरिसकेको छ। नेवार समुदायको परिकार ‘योमरी’ नेपालमा दर्ता भएको पहिलो अभौतिक सम्पदा भएको उनले जानकारी दिए ।
“यो विधेयक कानुन बनेपछि मौलिक अभ्यासहरूको सूचीकरण मात्र नभई प्रचार–प्रसार र संरक्षणमा समेत ठूलो टेवा पुग्नेछ,” मन्त्री पाण्डेको भनाइ छ।
विधेयक निर्माणको क्रममा सरोकारवाला पक्षहरूसँग विस्तृत छलफल गरिसकिएको मन्त्री पाण्डेले जानकारी गराए ।
