अर्थ प्रणाली 
काठमाडौं । गैरआवासीय नेपाली संघ(एनआरएनए) ले कतार लगायत मध्यपूर्व क्षेत्रमा कुनै आपत परेमा ९८०१८६११२३, ९८०१८६११०६, ९८०१८६११०० नम्बरमा फोन गर्न नेपालीहरुलाई आग्रह गरेको छ । इजरायल र इरानबीचको युद्धका कतार लगायत समग्र मध्यपूर्व क्षेत्रको अवस्था संवेदनशील बनेको भन्दै एनआरएनएले आपत परेमा सम्पर्क गर्न भनेको हो ।
एक विज्ञप्ति जारी गर्दै एनआरएनएले भनेको छ, ‘गैरआवासीय नेपाली संघले सम्पूर्ण नेपाली समुदायको सुरक्षा, सहजीकरण र मनोबल उच्च राख्ने प्रयास गर्दै आएको छ । यस कठिन परिस्थितिमा हामी निरन्तर सम्पर्कमा रहने प्रतिबद्धता जनाउँदै आपतकालीन अवस्थाहरूमा आवश्यक सहयोगका लागि सिधा सम्पर्क गर्न परेमा २४ सै घण्टा उपलब्ध रहने ९८०१८६११२३, ९८०१८६११०६ र ९८०१८६११०० नम्बरहरूमा सम्पर्क गर्न आग्रह गर्दछौँ ।’
यस्तै गैरआवासीय नेपाली संघको हटलाइन सेवामा पनि सम्पर्क गर्न सकिने एनआरएनएले उल्लेख गरेकाे छ ।
संघले संवेदनशिल अवस्थामा त्यहाँ रहेका नेपालीहरूलाई निम्न सावधानी अपनाउन एनआरएनएले भनेको छ ।
सुरक्षित स्थानमा रहनुहोस् – भिडभाड भएका सार्वजनिक स्थलहरूमा जानबाट यथासम्भव टाढा रहनुहोस्।
सम्पर्कमा रहनुहोस् – आफ्नो परिवार, साथी तथा नियोग (एनआरएनए, नेपाली दूतावास, स्थानीय संस्थाहरू) सँग निरन्तर सम्पर्कमा रहनुहोस्।
स्थानीय सुरक्षा निर्देशन पालना गर्नुहोस् – सरकारले जारी गर्ने सूचना, निषेधाज्ञा वा सुरक्षासम्बन्धी आदेशलाई प्राथमिकताका साथ पालना गर्नुहोस्।
आपतकालीन तयारी राख्नुहोस् – राहदानी, परिचयपत्र, मोबाइल चार्जर, आवश्यक औषधि, खानेकुरा र पानीजस्ता सामग्री सधैं साथमा राख्नुहोस्।
दूतावास तथा एनआरएनए एनसीसीको सम्पर्कमा रहनुहोस् – कुनै पनि आकस्मिक वा विषम परिस्थितिमा तुरुन्तै गैरआवासीय नेपाली संघको एनसीसी वा नेपाली दूतावासमा सम्पर्क गर्नुहोस्।
यसका साथै एनआरएनएले त्यहाँ उत्पन्न द्वन्द्व र यसका सम्भावित प्रभावहरुलाई अत्यन्त गम्भीरताका साथ लिँदै त्यहाँ रहेका नेपाली नागरिकहरुको सुरक्षालाई उच्च प्राथमिकतामा राखेर नेपालीहरुको सुरक्षा र आवश्यकताका आधारमा स्वदेश फिर्तीका सम्बन्धमा ध्यान केन्द्रित गर्न नेपाल सरकारलाई अनुरोध गरेको छ ।
