अर्थ प्रणाली 
काठमाडौं । नेपालमा बीवाईडीको आधिकारिक वितरक साइमेक्स इंकले बीवाईडी हाई–टेक विक २०२५ सुरु गरेको छ । काठमाडौंको एभरेष्ट होटल परिसरमा बिहीबार पत्रकार एवं संचारकर्मीहरुलाई आफ्ना विभिन्न ४ ब्राण्डका गाडीहरु सार्वजनिकसँगै प्रदर्शनी गरी बीवाईडी हाई–टेक विक २०२५ सुरु भएको घोषणा गरिएको हो ।
भोलि(शुक्रबार) देखि सर्वसाधारणका लागि खुला हुने हाइटेक वीक मार्च २ सम्म चल्नेछ । अर्थात् फागुन १५ गतेदेखि १८ गतेसम्म हाइटेक वीक आयोजना हुने कम्पनीले जनाएको छ ।
हाइटेक वीक इलेक्ट्रिक मोबिलिटी र अत्याधुनिक प्रविधिलाई मानिसहरुले कसरी अनुभव गर्दछन् भन्ने कुरामा क्रान्तिकारी परिवर्तन ल्याउने यस प्रकारकै पहिलो इभेन्ट भएको कम्पनीको दाबी छ ।
प्रदर्शनीमा बीवाइडीले ३६० डिग्री टर्नसहित विभिन्न टेक्नोलोजीहरु डिस्प्ले गरेको छ । चीनबाट आएका प्रतिनिधिसहितको उपस्थितिमा बीवाइडीले प्रदर्शनी गरिरहेको हो । प्रदर्शनीमा बीवाइडीले इनोभेसनमा कसरी काम गरिरहेको छ भन्ने प्रष्टरुपमा देखाएको छ । कम्पनीले हाइटेक प्रदर्शनीमा आफ्नो तेस्रो जेनेरेशन ई–प्लेटफर्म ३.० र ब्लेड ब्याट्रीको नेल पेनेट्रेसन टेस्ट समेत प्रत्यक्ष देखाएको छ ।
बीवाईडी हाई–टेक विक २०२५ एउटा प्रदर्शनी मात्र नभई एउटा ल्यान्डमार्क इभेन्ट रहेकाे र ईभी टेक्नोलोजी, एआई इन्टिग्रेसन र न्यु इनर्जी सोलुसनलाई एउटै छानामुनि ल्याउने काम भएको कम्पनीको भनाइ छ । शिक्षा दिने, संलग्नता बढाउने र प्रेरणा प्रदान गर्ने उद्देश्यका साथ डिजाइन गरिएको सो इभेन्ट औद्योगिक व्यवसायी, ईभी प्रयोगकर्ता, प्रविधि उत्साही र सामान्य व्यक्ति सबैका लागि पुग्नै पर्ने स्थल बनेको देखिन्छ ।
लाइभ डेमो त्यहाँको मुख्य आकर्षणको रुपमा रहेको छ ।
आज संचारमाध्यमहरुका लागि खुला भएकाे प्रदर्शनीमा विभिन्न गाडीहरुको एड्भान्स फिचरहरुको लाइभ डेमोस्ट्रेस गरिएको थियो । पछिल्लो ईभी ट्रेन्ड र एनईभी टेक्नोलोजीको भविष्य बारेमा यो उद्योगका नेतृत्वकर्ता, इन्जिनियर र सस्टेनेबिलिटी एड्भोकेटहरुबाट महत्वपूर्ण जानकारी लिन पनि वीक महत्वपूर्ण हुने दाबी गरिएको छ ।
बीवाईडी हाई–टेक विक २०२५ ले जनचेतना प्रदान गर्ने, इनोभेसनलाई बढावा दिने र नेपालको मोबिलिटी भविष्यलाई अझै तीव्रता दिने लक्ष्य राखेको छ । अटोमोटिभ उत्साही, प्रविधि अन्वेषक र ग्रिन इनर्जी एड्भोकेट लगायत सबैका लागि सो इभेन्टले एक अनुपम अवसर प्रदान गर्ने र यहाँ मोबिलिटीको भविष्य बारेमा अध्ययन अन्वेषण गर्न सकिने छ ।
बीवाईडी हाई–टेक विक २०२५ का लागि टिकट ई–सेवामा उपलब्ध छ । विद्यार्थीलाई परिचयपत्रका आधारमा निःशुल्क प्रवेशको सुविधा उपलब्ध हुने कम्पनीले जनाएको छ ।
