अर्थ प्रणाली 
काठमाडौं । आगामी फागुन २१ गते सम्पन्न हुने प्रतिनिधि सभा सदस्य निर्वाचनको मिति घोषणा भएपछि स्थगित भएको मतदाता नामावली सङ्कलन कार्य पुनः सुरु भएको छ । निर्वाचन आयोगको निर्णयअनुसार मिति २०८२ कातिक ३० गतेसम्म यो कार्य सञ्चालन हुनेछ । आयोगका अनुसार यस अवधिमा १६ वर्ष उमेर पूरा भई नेपाली नागरिकताको प्रमाणपत्र प्राप्त गरेका तर यसअघि मतदाता नामावलीमा नाम दर्ता नभएका नागरिकहरूले दर्ता गर्न सक्नेछन् ।
दर्ता प्रक्रिया सार्वजनिक विदा बाहेक विहान ८ बजेदेखि साँझ ६ बजेसम्म प्रदेश निर्वाचन कार्यालय तथा जिल्ला निर्वाचन कार्यालयमा सम्पन्न गर्न सकिने व्यवस्था मिलाइएको छ । मतदाता नामावली दर्ता गर्न आयोगको वेवसाइटमा प्रि–रजिष्ट्रेशन प्रणाली प्रयोग गरी आवेदन भर्न सकिनेछ । त्यसपछि सम्बन्धित प्रदेश वा जिल्ला निर्वाचन कार्यालयमा गएर जैविक (बायोमेट्रिक) विवरण उपलब्ध गराउनुपर्नेछ ।
