अर्थ प्रणाली 
दैलेख। नेपाल कम्युनिष्ट पार्टी (माओवादी केन्द्र) का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले आत्मनिर्भर समाजवादी अर्थतन्त्र निर्माणको खाका प्रस्तुत गर्दै त्यसमा जुट्न कार्यकर्तालाई आग्रह गरेका छन् ।
मध्यपहाडी लोकमार्ग केन्द्रित माओवादी केन्द्रको जनजागरण अभियान अन्तर्गत दैलेख जिल्ला समन्वय समिति दैलेखको पूर्ण बैठकमा सहभागी हुँदै प्रचण्डले यस्तो आग्रह गरेका हुन् । उनले भने “हामीले गहिरो अध्ययन र अनुसन्धानमार्फत समाजवादी अर्थतन्त्रको ढाँचा निर्माण गर्न थालिसकेका छौं। विज्ञ टोलीले त्यसमा कार्य गरिरहेको छ।”
अध्यक्ष प्रचण्डले विभिन्न पार्टीहरूसँग पार्टी एकता प्रक्रिया सकारात्मक दिशातर्फ उन्मुख रहेको बताउँदै विचार र राजनीतिक आधारमा टेकेर मात्र एकता गर्दा दीगो एकता सम्भव हुने धारणा व्यक्त राखेका छन् । “पार्टीको यथास्थितिमा परिवर्तन ल्याउने भनेको संगठन रूपान्तरण गर्नु हो,” उनले स्पष्ट पारेका छन् ।
अध्यक्ष प्रचण्डले पार्टीभित्र सबैका मतप्रति सम्मानसहित पार्टी भित्र एकमत कायम गर्दै एकताका लागि आफूहरू लगातार प्रयत्नशील रहेको र पार्टीले समग्र रूपमा देशको नेतृत्व गर्न सक्षम संगठन निर्माणमा ध्यान केन्द्रित गरिरहेको बताएका छन् ।
