अर्थ प्रणाली 
काठमाडौं । नेपाल आयल निगमले १० अर्ब नाफा कमाएको छ । शुक्रबार नेपाल आयल निगम लिमिटेडको ५५ औँ वार्षिकोत्सवका अवसरमा निगमका कार्यकारी निर्देशक डा. चण्डिका प्रसाद भट्टले सो जानकारी गराएका हुन् ।
उनले भने, ‘समयमा नै अन्तिम लेखा परीक्षण कार्य सम्पन्न गरिएको छ । हामी करिब १० अर्ब नाफामा छौं ।’ उनले स्वचालित मूल्य प्रणालीले निगमको आर्थिक अवस्था दिनप्रतिदिन सुदृढ हुँदै गएको दाबी गरे ।
भट्टले निगमको सुदृढ अवस्थाबारे जानकारी दिँदै भने, ‘स्वचालित मूल्य प्रणाली नभएको अवस्थामा मूल्य निर्धारण गर्न कठिन थियो । हरेक पटक मूल्य निर्धारणको समयमा निगम घेराउमा पर्ने गर्दथ्यो । स्कुल कलेजमा हड्ताल हुने गर्दथे । नेपाल बन्द हुन्थ्यो । सडकमा टायर बालिन्थ्यो । २०७१ सालदेखि स्वचालित मूल्य प्रणालीले निगमको आर्थिक अवस्था सुदृढ भएको छ । पहिलेका समस्याहरूको समाधान गरिएको छ ।’
ढुवानीमा हुने अनियमिततामा समेत कम भएको उनको भनाइ थियो । निगमले केही नयाँ कामको थालनी गरेको समेत उनले जानकारी दिए ।
‘सिनामंगल डिपो स्थानान्तरणको काम शुरू भएको छ । पेटोलमा इथानोल मिश्रण गर्ने कार्यका लागि कार्यविधि तयार गरेर अन्य कार्य शुरू गरिएको छ । एलपीजीको घरायसी र व्यापारिक फरक मूल्य कायम गर्ने कार्य सुरू गरिएको छ,’ भट्टले भने ।
भिडियो हेर्न तलको रातो लिंक क्लिक गर्नुहोस् ।
https://www.facebook.com/arthapranali/videos/614587137812312
