अर्थ प्रणाली 
दैलेख जिल्लाको भैरवी गाउँपालिका–१ जलजलेमा पेट्रोलियम पदार्थको अन्तिम अन्वेषण तथा उत्खननका लागि आवश्यक पर्ने पूर्वाधार निर्माण र उपकरण जडान कार्य सकिएसँगै पेट्रोलियम अन्वेषणात्मक ‘बेल ड्रिलिङ’ सुरु भएको हो । उद्योग वाणिज्य तथा आपूर्तीमन्त्री दामोदर भण्डारी पेट्रोलियम पदार्थको अन्बेषणात्मक ‘बेल ड्रिलिङ’ कार्यको उद्घाटन गरेका छन् ।
पेट्रोलियम पदार्थको अन्बेषणात्मक ड्रिलिङ कार्यको उद्घाटन गर्दै मन्त्री भण्डारीले देशमा रहेका थुप्रै खानीहरूको अध्ययन, अनुसन्धान गरी उत्खनन गर्न नेपाल सरकार लागिरहेको बताए । मन्त्री भण्डारीले दैलेखमा पेट्रोलियम पदार्थ भएको पुष्टि भएमा पेट्रोलियम पदार्थको आयात होइन निर्यात गर्ने मुलुककारूपमा नेपाल चिनिने धारणा समेत राखे । मुख्य ड्रिलिङको काम सक्नेबित्तिकै पेट्रोलियम पदार्थको भए/नभएको पत्ता लाग्ने र थप अन्वेषण तथा उत्खननका कामहरू हुने मन्त्री भण्डारीको भनाइ छ ।
खानी तथा भूगर्भ विभाग पेट्रोलियम अन्वेषण परियोजनाका प्रमुख दिनेशकुमार नापितले मुख्य ड्रिलिङको काम सुरु भएको चार महिनाभित्र सम्पन्न गरिसक्ने गरी काम भइरहेको जानकारी दिएका छन् । चीनको केरुङ नाकाबाट अन्य उपकरण ल्याउने तयारी भइरहेको बताइएको छ ।
तत्कालीन समयमा भारतले लगाएपछि नाकाबन्दी लगाएपछि तत्कालीन प्रधानमन्त्री केपी शर्मा ओलीले परियोजनाको कार्य सुरु गरेका थिए ।
दैलेखमा रहेको पेट्रोलियम पदार्थ अन्वेषण गर्न २०७२ चैतमा चीन र नेपालबिच प्रधानमन्त्रीस्तरीय द्विपक्षीय समझदारी भएको थियो । २०७६ फागुनमा विभाग र चिनियाँ जियोजिकल सर्भे कम्पनीबिच अन्वेषण र उत्खनन् गर्न २ अर्ब ४० करोडको आर्थिक तथा प्राविधिक सम्झौता भएको थियो ।
