अर्थ प्रणाली 
बागमती । भोलि चैत १३ गतेदेखि हेटौँडामा बागमती प्रदेशस्तरीय कृषि प्रदर्शनी मेला–२०८२ आयोजना हुने भएको छ । मकवानपुर उद्योग वाणिज्य संघको आयोजनामा चैत १६ गतेसम्म प्रदर्शनी आयोजना हुन लागेको हो । बागमती प्रदेशका किसानको मनोबल अभिवृद्धि गर्नुका साथै युवा शक्तिलाई कृषितर्फ आकर्षित गर्ने उद्देश्यले मेला आयोजना गर्न लागिएको सङ्घका अध्यक्ष प्रमोदसिंह रानाभाटले बताएका छन् ।
हेटौँडास्थित पल्पसा सदनमा आयोजना हुने मेलामा मकवानपुरसहित सिन्धुली, रामेछाप, काभ्रे, काठमाडौँ र चितवनलगायतका जिल्लाका कृषक तथा कृषि उद्यमीहरूको सहभागिता रहने उनले जानकारी दिए । कोदो, जुनेलो, फापरको पिठो, गेँडागुडी, मह, मसला, बाँसका सामग्री, केराका परिकार, अचार, धुप, गोबरबाट बनेको दियो, म्याट, मस्यौरा, क्यान्डी, आलु, गुन्द्रुक, जुनारको जुस, दाना, अण्डा, तेल, च्याउ, माछा, डेरी उत्पादनलगायतका सामानको प्रदर्शनीमा ४० वटा स्टल निःशुल्क उपलब्ध गराइने अध्यक्ष रानाभाटले बताए ।
बागमती प्रदेश सरकार र हेटौँडा उपमहानगरपालिकाको आर्थिक सहयोगमा आयोजना गर्न लागिएको मेलामा कृषि प्रविधिसम्बन्धी उपकरणसमेत प्रदर्शनीमा राखिने छन् ।
