अर्थ प्रणाली 
काठमाडौं, नेपाल । नेपालमा रोबोटिक्स, स्वचालन (Automation) र प्रविधिको भविष्यलाई उजागर गर्ने उद्देश्यका साथ आयोजित ‘रोबो फेस्ट ४.०’ भव्यताका साथ सम्पन्न भएको छ। प्रतिभा र युवा जाँगरको असाधारण प्रदर्शनीका रूपमा रहेको यस कार्यक्रमको उद्घाटन डा. कविराज बान्तवा र नरहाङ राईले संयुक्तरूपमा गरे ।
युवा नवप्रवर्तन र शैक्षिक प्रदर्शनी उद्घाटनपश्चात् सञ्चालक समितिका सदस्यहरू डा. बान्तवा र राईले कक्षा ११ का विज्ञान संकायका विद्यार्थीहरूले तयार पारेका विभिन्न स्टलहरूको अवलोकन गरे । ‘टिल्ट सेन्सर डेमोन्स्ट्रेशन’ देखि ‘स्मार्ट ग्रीनहाउस’ सम्मका नवीन आयोजनाहरूले नेपाली विद्यार्थीहरूको प्राविधिक क्षमतालाई प्रमाणित गरेका थिए। अवलोकनका क्रममा सञ्चालकहरूले विद्यार्थीहरूलाई आविष्कारको प्रभावकारिता र व्यावसायिक सम्भाव्यताका बारेमा रचनात्मक सुझावहरू समेत दिएका थिए । प्रदर्शनीको एक मुख्य आकर्षणका रूमा मेसिनद्वारा निर्मित डा. कविराज बान्तवाको स्केच रहेको थियो, जसबाट प्रभावित भई उनले विद्यार्थीलाई प्रोत्साहनस्वरूप नगद पुरस्कार समेत प्रदान गरे ।
संस्थागत सहयोग र विश्वव्यापी प्रविधि यस पटकको रोबो फेस्टमा कर्पोरेट र शैक्षिक क्षेत्रको दरिलो उपस्थिति थियो। PCPS, हब इन्टरनेशनल, र क्ल्याम्पहुक जस्ता संस्थाहरूले प्रविधि इकोसिस्टममा आफ्नो योगदान प्रस्तुत गरेका थिए। कार्यक्रमको विशेष आकर्षणका रूपमा फोटोन मोटर्स (Foton Motors) द्वारा प्रदर्शित ‘ह्युमनोइड रोबोट’ रहेको थियो, जसले विश्वभर रोबोटिक्सले मारेको फड्कोलाई प्रत्यक्ष अनुभव गराएको थियो।
रोमाञ्चक प्रतिस्पर्धा र विजेताहरू फुटसल एरिनामा आयोजित ‘रोबो सकर’ र ‘रोबो सुमो’ प्रतियोगितामा काठमाडौं उपत्यकाका प्रतिष्ठित विद्यालयहरू (KMC, प्रज्ञा कुञ्ज, युनाइटेड स्कूल, युनाइटेड युनिभर्सल स्कूल, समृद्धि स्कूल, लिटल एन्जल्स, र रिपुमर्दिनी) बीच कडा प्रतिस्पर्धा भएको थियो।
रोबो सकरका विजेताहरू:
प्रथम: श्रीयान्स जंग केसी (युनाइटेड युनिभर्सल स्कूल) – रु. ३२,०००।
द्वितीय: ताल रोकाया (प्रज्ञा कुञ्ज स्कूल) – रु. २१,०००।
तृतीय: किरण खत्री (युनाइटेड स्कूल) – रु. १०,५००।
भविष्यको मार्गचित्र कार्यक्रमको समापनमा कम्प्युटर एशोसिएशन नेपाल (CAN Federation) का वरिष्ठ उपाध्यक्ष चिरञ्जीवी अधिकारीले सम्बोधन गर्दै भने, “रोबो फेस्ट ४.० एउटा प्रतिस्पर्धा मात्र नभएर नेपालमा रोबोटिक्स उद्योगका लागि आवश्यक आधार र इकोसिस्टम निर्माण गर्ने महत्वपूर्ण मञ्च हो।” उनले STEM (विज्ञान, प्रविधि, इन्जिनियरिङ, र गणित) क्षेत्रमा युवाहरूको संलग्नता बढाउनुपर्नेमा जोड दिए।
यस कार्यक्रमको मिडिया पार्टनरको रूपमा ICT Frame रहेको छ, जसले नेपाली प्रविधिको विकास र प्रवर्द्धनमा निरन्तर सहयोग पुर्याउँदै आएको छ।
