अर्थ प्रणाली 
काठमाडौं। नेपाल स्टक एक्सचेन्ज (नेप्से) ले विश्लेषक वा सामाजिक सञ्जालमा आउने हल्लाको भरमा मात्रै लगानी नगर्न लगानीकर्ताहरुलाई आग्रह गरेको छ।
एक सूचनामार्फत नेप्सेले लगानीकर्तालाई यस्तो आग्रह गरेको हो । नेप्सेले नेपालमा बजार विश्लेषकको रूपमा हालसम्म कसैलाई मान्यता नदिइएको भन्दै ती र त्यस्ता विज्ञको विश्लेषण वा सामाजिक सञ्जाललाई हेरेर लगानी नगर्न भनेको हो ।
नेप्सले सूचनामा लेखेको छ, ‘नेपालमा हालसम्म कुनैपनि निकायबाट कसैलाई पनि बजार विश्लेषकको रूपमा दर्ता गर्ने वा मान्यता प्रदान गर्ने गरिएको छैन । फेसबुक, ट्विटर, क्लबहाउस लगायतका सामाजिक सञ्जाल वा आम सञ्चारका माध्यममा त्यस्ता विश्लेषक वा विज्ञका नाममा आउने विश्लेषणलाई मात्र आधार बनाई लगानी गर्दा जोखिममा पर्न सकिन्छ । त्यसैले यथार्थ बुझेर लगानीसम्बन्धी निर्णय गर्न नेपाल स्टक एक्सचेन्ज (नेप्से) सम्बन्धित सबैलाई अनुरोध गर्दछ।’
पछिल्ला दिनहरुमा आफ्नो स्वार्थअनुरुप सामाजिक सञ्जालहरुमा गलत विश्लेषण हुने र त्यसको आधारमा लाग्दा धेरैले लगानी गुमाइरहेका छन् ।
