अर्थ प्रणाली 
काठमाडौं । अब कोही कसैले सामाजिक सञ्जालमा फेक आइडी बनाएर वा छद्मभेषी पहिचान निर्माण गरेमा पनि कसुर हुने भएको छ । तोकेको निकायमा सूचीकरण नभए फेसबुक, एक्सलगायतका सामाजिक सञ्जाल सञ्चालनमा रोक लगाउने गरी सरकारले सामाजिक सञ्जाल सञ्चालन, प्रयोग तथा नियमनसम्बन्धी विधेयक संसद्मा दर्ता गरेसँगै यो विषय बाहिर आएको हो । सञ्चार तथा सूचना प्रविधिमन्त्री पृथ्बीसुब्बा गुरुङका तर्फबाट विधेयक राष्ट्रिय सभामा दर्ता भएको छ ।
विधेयकमा फेक आइडी, पेज तथा समूह बनाई सामग्री प्रचार गरेमा तीन महिनासम्म कैद वा ५० हजार रुपैयाँसम्म जरिवाना हुने प्रस्ताव गरिएको छ । सामूहिक वा व्यक्तिगत रूपमा स्थायी वा अस्थायी समूह पेज वा अन्य आइडीबाट राष्ट्रहित प्रतिकूल कार्य गरेमा पाँच वर्षसम्म कैद वा १५ लाख रुपैयाँसम्म जरिवानाको प्रस्ताव गरिएको छ ।
त्यस्तै आइडी ह्याक गरेमा तीन वर्षसम्म कैद र १५ लाख रुपैयाँसम्म जरिवाना, कसैको निजी वा सार्वजनिक तस्विर सामाजिक सञ्जालको प्रयोग गरी सार्वजनिक गरेमा र त्यस्तो कार्यको धम्की दिई आर्थिक लाभ लिएमा तीन वर्षसम्म कैद र १५ लाख रुपैयाँसम्म जरिवाना, अश्लील तथा मिथ्या सामग्री प्रचार गरेमा दुई वर्षसम्म कैद वा तीन लाख रुपैयाँसम्म जरिवाना लगायतका प्रस्ताव सरकारले गरेको छ ।
विधेयकमा संघीय संसदबाट कानुन पारित भई कार्यान्वयनमा आएको छ महिनाभित्र हाल सञ्चालनमा रहेका प्लेटफर्महरू सूचीकरण हुनुपर्ने व्यवस्था प्रस्ताव गरिएको छ ।
