अर्थ प्रणाली 
नयाँ दिल्ली । भारतको नयाँ दिल्लीमा नेपाल–भारत व्यापार सम्झौताको विषयमा छलफल भएको छ । नाडाका अध्यक्ष करण चौधरीको नेतृत्वमा गएको नाडा प्रतिनिधिमण्डलले भारतको राजधानी नयाँ दिल्लीमा भारत सरकार, वाणिज्य विभागका सहसचिव विमल आनन्द र इन्जिनियरिङ्क एक्सपोर्ट प्रमोशन काउन्सिल अफ इण्डिया (इइपिसी) का राष्ट्रिय अध्यक्ष पंकज चड्डासँग नेपाल र भारतको व्यापार सम्झौतालाई थप विस्तार र प्रभावकारी बनाउने विषयमा छलफल भएको छ । द्धिपक्षीय आयात निर्यातलाई कसरी सुदृढ बनाउन सकिन्छ भन्ने विषयमा पहिलो चरणको छलफल सम्पन्न गरेको हो ।
अर्को चरणको छलफलको लागि दुवै पक्षले अर्को मिति तोकेर भारतको इइपिसीलाई नेपालमा निमन्त्रणा गर्ने भएको छ । उक्त छलफलमा अटोमोबाइल कम्पोनेन्ट, अटोमोबाइल स्पेयर पार्टस र विद्युतीय सवारी साधनहरुका विषयमा छलफल गरिने बताइएको छ ।
यही जनवरी १७ देखि २१ सम्म भारतको नयाँ दिल्लीमा आयोजना भईरहेको भारत मोबिलिटी अन्तर्गत भईरहेको अटो प्रदर्शनीको सन्दर्भमा नाडा केन्द्रीय कार्य समितिका पदाधिकारी तथा सदस्यहरुको प्रतिनिधिमण्डल भारत भ्रमणमा रहेको छ ।
उक्त छलफलमा इन्जिनियरिङ्क एक्सपोर्ट प्रमोशन काउन्सिल अफ इण्डिया (इइपिसी) का तर्फबाट पूर्व अध्यक्ष अरुण गारोडिया, सह–निर्देशक पल्लवी साह, कार्यकारी निर्देशक तथा सचिव अधिपमित्रा र निर्देशक नीशिकान्त जुम्दा समेतको उपस्थिति रहेको थियो । त्यसैगरी नाडाको तर्फबाट निवर्तमान अध्यक्ष डा. धु्रव थापा, वरिष्ठ उपाध्यक्ष आकाश गोल्छा, संस्थागत उपाध्यक्ष पुष्कर ओझा, उपाध्यक्ष राजनबाबु श्रेष्ठ, महासचिव सुरेन्द्रकुमार उप्रेती, सचिव विक्रम सिंहानिया, कोषाध्यक्ष मिलनबाबु मल्ल र सहकोषाध्यक्ष पंकज अग्रवालसमेतको उपस्थिति रहेको थियो ।
