अर्थ प्रणाली 
काठमाडौं । दुई दिनदेखिको घनघोर वर्षाले देशभरको जनजीवन प्रभावित भएको छ । देशभर नै वर्षा, बाढी, पहिरो, डुबानका घटना भएका छन् । वर्षाका कारण जनधनको ठूलो क्षति भएको छ । कतिपय स्थानमा बाढीले मानिससहित, घरगोठ, पशुचौपाया, सरसामग्री बगाएको छ । त्यसैगरी राजधानी उपत्यकाका नदीसहित साना ठूला नदीहरुले जलसतह पार गरेको छ । धेरैतिर नदीले जलसतहको तह पार गरेपछि खतराको घण्टीको संकेत गरिएको छ ।
यता जलाशय भरिएपछि कुलेखानी जलविद्युत आयोजनाको २ वटा ढोका खुला गरिएको छ । जलाशयमा जोखिम नरहने गरी बाँधका ढोका खोलिएकोे कुलेखानी आयोजनाले जनाएको छ । मकवानपुर जिल्ला प्रशासन कार्यालयले कुलेखानी बाँधको ढोका खोल्दा तल्लो नदी तटीय क्षेत्रमा उच्च सतर्कता अपनाउन भनिएको छ ।
आज शनिबार पनि दिनभर निरन्तर झरी पर्ने मौसमविदहरुले बताएका छन् । बागमती र गण्डकी प्रदेशमा विशेषरुपमा झरी केन्द्रीत हुने अनुमान छ । अरु प्रदेशहरुमा पनि उत्तिकै सम्भावना छ । नदी केन्द्रित विवरणअनुसार नारायणी, देवघाट, बागमती, पधेरादोभान, कन्काई, मैनाचुली, कमला, वेलसोत, पूर्वी राप्ती, रजैया, पश्चिम राप्ती, कुसुम, बबई, चेपाङ, त्रिशूली लगायत नदीमा आज उच्च र मध्यम जोखिम रहने अनुमान छ ।
अविरल वर्षाका कारण जनधनको ठूलो क्षति हुनसक्ने खतरा भएकाले सतर्क रहन र सुरक्षित स्थानमा बस्न जल तथा मौसम विज्ञान विभागले सुझाएको छ ।
